voor Holten, door Holten

De teerling is e gôôit

0

Àmoa wat vuur de meuite. Wekkenlàànk heiw we ze wier e zeene op ’n Beelt. De verkèèrsrèègels mônn’n der drek vuur word’n an e past. Gen wôônder, at ze oe biej het folders en penn’n uutdeel’n, de vôôl’n zwat uut de bokse riedt.Vanals heiw we met noar huus hen e slept, van anzichkaart’n tut pett’n en ballonn’n. Kromme tèène kriej’ der van, aj’ heurt det er ôôlders bint, diet eur kinder verbèèdt,ne ballon an te pakk’n van de verkèèrde pertieje. Ôk disse wichter möt later in alle vriejhèid könn’n kiez’n, det is het môôie van dit hèèle kleine, mà oh zô machtig môôie läänneke. Ankômm’nden vriejdag zal ’t wier röstig weer op de mark. ‘N eenigsten denj’ dan nog zeet is den ôôld’n wethoolder met den vetleer’n hood op, mà ja, den hef pensioen. Of de man met de rôôie dasse det ôk hef, is nog mà de vroage. Hij geet vuur vief zetels. At e mazzel hef mag e met drei zetels in de road bliem’n zitt’n, mà dan möt de rôôi’n merakels deepe in de busse bloaz’n en vuur honderd precèènt, àmoa noar de stembusse weer’n e wes. Ôônz’n leem’n Heer hef de zaak’n good op riege. Met nen opkomst van zèumtig precèènt blieft de mannenbroeders van de SGP op zèum zetels. Ôk het CDA en CU blieft an boord met vief en vèèr zetels. Loaw we de bèire niejkommers het allerbeste gunn’n, met allebèire één steultje vuur de meuite. De rekkening kump dan wà te ligg’n biej Gemeentebelang en de VVD. Ondàànks de verbund’n lieste, goat ze bèire ne zetel verleez’n, of de Hoolter möt massaal noar het stemlokaalweer’n e wes. Àllèène at één van de niej’n het neet haalt, krig één van bèire der ne zetel biej. Hetzelfde college zôl könn’n bliem’n zitt’n. Mà Lech’nbarg en de Veeldwachter goat met pensioen, doar möt dus ààndern vuur kômm’n. Het schient det ôk de wethoolder van de PvdA neet hèèmoa good in de mark lig, dus doar kan ôk nog verschoeving’n kômm’n. De Christelijke pertien hôôlt duudelijk de meerderheid, mà het zôl eur sier’n at ôk de Hoolter pertien ne stemme kriegt in het nieje college. Loat er in ieder geval duudelijk oaverleg weer en gen achterkàemerkespolitiek. Met gezôônd verstàànd en goeie wille kom ie ne hèèl’n èine. Loawe hopp’n det iedereenne hen stemm’n is e wes. Biej nen opkomst van vieftig tut zestig precèènt zölt de kaart’n wier hèèl ààns ligg’n. Wiej zölt zeen. De ofgelôôp’n vèèr joar bint er spiekers met köppe e sloane. Det kan oe wal of neet akkedèèr’n, mà doar gebuur’n wat. Vuur de kommende joar’n stoat er wier grôôtse plannen op stapel. Gelukkig biej’, àj’ hen stemm’n bint e wes. Dan maj’ tenminste tèèg’n het college an schupp’n. Neet stemm’n heult in, vèèr joar de kleppe dichte. De lèu, diet e kèuz’n bint wèèns ik völle krach en wiesheid vuur de vaake, ondàànkbare taak, diet ze op zich nemt. Wis en waarachtig.
De Vèèrkàànte Viefkop

Laat een antwoord achter

Uw e-mailadres wordt niet gepubliceerd.