voor Holten, door Holten

De börgemèister kump toch wà noar ’n Diekerhook?

0

Det maj’ tenminste verwach’n. Het zôl toch eeuwig zunne weer, at al die Splôôder noar ’t Diekerhookse fees zôll’n kômm’n en de börgemèister zôl der neet weer. Dan heij ’t schoap an ’t driet’n. Dan is Hollàànd ech in las en heij’d’r wier ne hôôp hellige Hoolter biej. Nee, rekkent ter mar op det ze komt. De börgemèister en de veeldwachter,bèire op de fietse vanof Lech’nbarg of zôl ter Keurs zô gek weer um ze op te pikk’n? Wiej wacht het of. Kômm’n det doot ze, doar bint ze ja völs te niejsgierig vuur. Het is één van de wèinige kèèr’n det ze is wier könt heur’n wat ter àmoal in Hoolt’n spölt. Het is ôk ne môôie gelèèg’nheid um as Hoolter, kennis te maak’n met de nieje börgemèister en een betje biej te proat’n met ôônze “nieje” bestuurders. Het is ôk wal is fijn um uut eeg’n môônd te heur’n oaver det transferium. Hoedeuinig of det in mekaa stek. Honderd en viem’ntwintigduuz’nd wördt ter in e stökk’n. Doar bint ter netuurlijk altied wà wat diet drek roopt van, hosanna, mà wèèst doar vuurzichtig met, want vuur daj’ der arg in hebt stoaj’ wier biej ’n rechter en möj’ vuur de zôvölste kèèr met de bill’n blôôt. ‘N Smidsbeelt, det is noe e rèègelt. Gen blauwe zône, mà zèum’ntwintig perkèèrplaats’n. Gen strèèp’n mà klinknèègels en vanof vief juli een niej café. Het is gen café “De Denneboom” of “De Zwaan”, mà “Tastoe”. Loawe met mekaa hopp’n, det ôônz’n Beelt ter al met al starker uut kump. Um op ’n Diekerhook trugge te kômm’n. Vriejdagoamd, de revue, aj’ neet e neumt wordt, heurj’der neet meer biej. Zundagmiddag bint ze der wier, Bôh fôi toch. Èèm’n de zörg’n en het wereldkampioenschap voetbal vergett’n. Vèèrkàànte ôôg’n kriej’ der van, mar ôk ne lamm’n vinger van het hen en wier schakeln tuss’n van Gelder en Derks’n. ‘N een’ löt alle daag’n een paar van die voetbalbobo’s invleeg’n en ’n ààndern zit môôi weer te spöll’n biej het Kurhaus in Schevening’n. Doar wördt e gooit met geeld. Plietsiebaaz’n verdeent in één kèèr völle meer as det mag en op de zörg wördt beknibbeld. Det ter bezuunigt möt word’n is ôôns wà duudelijk, mà bezuunigen op kruk’n en rollators, det geet te veer. In’ Haag bint ze een kabinet an ’t in mekaa timmern woet de VVD neet weeld van is. Wilders zit à lange met vakàànsie in Marokko. De uutkomst van de hèèle timmerieje kôn wal is word’n, det de VVD met de PvdA en het CDA in de regering zit en det war’n toch die bèire pertiën diet het vuurige kabinet hebt loat’n ploff’n. Het blif môddern, of zô as een wies man ôôit zèè, “Heere, laat het hooi regenen, want de ezels spreken latijn”. Àmoal, een môôi Diekerhooks feest. Wis en waarachtig.

De Vèèrkàànte Viefkop.
 

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link