• Leven in Holten
  • Contact
  • Leven in Holten
  • Contact

Boakhoolt, boakhoolt

5
GEDEELD

Ôôit bràànd’n der wà dartig Poasvèur’n in en umme Hoolt’n. Àmoa kleine boakes. Het sneuihoolt wörd’n argens achter op ’t làànd biej mekaar evèurt en dan, op ’n èèrst’n Poasdag gung de vlamme der in. Het was neet ààns. Vuurjoar, de vèugeltjes nösselt, mar op de Poaswèires blif het röstig. Hoe machtig was het toch at vaa, op Goei’n Vriejdag, kwam help’n um het leste hoolt noar boam’n te krieg’n. In één kèèr loop ie wier, met de lange, zwoare lädder oaver de nekk’n, ôônder langs ’n Beelt, oaver het Klôômpspad. De schoolder dut oe nog zeer, àj’ der an dèènkt. Iedereene helpt met um het onwillige eek’nhoolt noar boam’n te krieg’n. Vandaage met het peerd van de Koetsier, ’n Zoerbarg in um ne vracht broam’n te haal vuur de ofdekking. Broam’n, möj noe is flikk’n. Binn’n de kortste kèèr’n heij’ de plietsie achter oen stoan. De herinnering’n an die môôie tied’n borrelt noar boam’n. Het Poasvèur van de Soertjes, achter in de Geurd’n. Vol ontzag stoaj’ in de vlamm’n te kiek’n diet alsmà hèuger en hèuger, eur weg zeukt in het duuster. Ie bargt oe vuur de hette achter de rökke van oe moo. Dan zit ie wier boam’n op ne vrach denn’n, dwars duur Hoolt’n en mà zing’n det het Rooie Darp, de Noord’nbarg en de Koljödd’n in het kissie zit van pepier en de Haarjödd’n boam’n. Het hèèle joar duur wàj’ kammereui, mà dan èèm’n neet. Het was neet de tied van die allergrötste vèur’n, mà wà van de allergrötste wille. Diekerhook en Splôô wadd’n veer weg van ’t darp. Ôk doar stunn’n meerdere klèine boakes. Neet alle vèur’n wörd’n an estökk’n op ’n èèrst’n Poasdag. Doar wadd’n boakes diet, ne dag later pas in de hens gung’n. Nee, het was neet makkelijk um een betje hoolt biej mekaa te krieg’n. Ie môgg’n bliej wèèr àj’ ne hààndkoare op twei raa môgg’n leen’n, um een paar täkke op te pakk’n en dan met een man of vèère vieve drukk’n en trekk’n um biej de boake te kômm’n. Ie gung’n in weer wind. Met troan’n in de ôôg’n worstel’n ie het, tak vuur tak, noar boam’n. De kôôle schnèèbujj’n nam ie vuur leef. Zô kwam ie kôôld en ofgebeuld biej huus en noe, dit joar, wier gen Poasvèur. Gen sneuihoolt, wàj’ of könt lèèvern. Gen jonge lèu diet met mekaa bèèzig bint. Ie mist ‘t, de gezellighèid, het noaberschap, het lèèm’n op det ôôle plattelàànd. Wiej hôôlt het op ’t oop’n joar. Dartig klèine vèur’n, oaveral in ôôns darp. Het is misschien een idee. Wat dan ôk, de ôôle traditie mag neet verleuirne goan. Wiej blieft verbund’n met det ôôle plattelàànd. Hèèl in de veert’n heur ‘k jonge lèu schreeuw’n, “Boakhoolt, Boakhoolt”. Het zal toch neet?

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.