• Evenementen
  • Holtense Index
  • Smidsbelt webcam
  • Leven in Holten
  • Contact
  • Evenementen
  • Holtense Index
  • Smidsbelt webcam
  • Leven in Holten
  • Contact

Bevrijding vuur àmoa?

Op 8 april à wier 76 joar elèène. Wat möt die bevrijding met gemengde geveul’ns bèlèèfd wèèr. Uutzinnig van wille of tut op het bot verdreetig. Zô völle femilies diet in rouw bint. De Joodse bevolking, zô good as àmoa vermoord. Zesendartig Hoolter. Zôvölle jonge Canadeez’n. Waanzin. Die geveulens bekröpp’n miej toen ‘k de Dèimter kràànte van ne dag later opsleuge. Kinder van de Regenboog hadd’n de “Stolpersteine”op epoetst. Machtig môôi det de Oudheidkamer hier alle joar’n andach vuur hef. De kinder lèèz’n de naam’n van de ongelukkigen vuur, Daniël, Jane, Louis en Bela Pagrach. Amoa umme ebrach in de gaskamers in Duutslàànd. Slechts ééne dochter uut dit gezin oaverlèèft de oorlog. Het indrukwekkende verhaal was à wier verdrung’n, toen ‘k zô mar een berichtje krèège uut Israel van Bela Samuel. Inderdaad, zie is verneumd noar de eerder geneumde Bela Pagrach. Zie had het kràànt’nartikel touw estuurt ekrèèg’n en was deepe ôônder de indruk. Eur moo, Betje Pagrach, etrouwd met David Samuel, van de ôôle Prins uut Nijverdal was de enige oaverlèèvende uut dit gezin. De gruwelen bint eigenlijk te arg um te vertell’n. Bela Pagrach had tbc. Zie kuur’n in een huuske achter eur ooldershuus. Vandoar wörd’n ze, zeek en wal, op 24 mei of evoert noar Westerbork en vandoar, op 16 juli 1943 vermoord in Sobibor. Noa de oorlog wörd’n der nargens meer oaver eproat. Iedereene môs mar umme goan met zien eeg’n verdreet. Mooder Betje en David Samuel bint nog vaake op visite ewes biej femilie in Hoolt’n. Iedere kèèr at zie langs het huus van eur vaa en moo kwam, kek ze de ààndere kàànte op. Het verdreet was te grôôt. Bela herinnert zich nog det ze in 2014, saam’n met eur dochter Hani, rôônd wörd’n eleid duur Gompert Gazan. Zie stunn’n met mekaa biej de struukelsteender. Één van de schoolwichter had een prachtig gedichtje emaakt. “Dit bint struukelstenen. Ie struukelt met oen harte en neet met oene beene.” Dat een kind zô iets kon schriem’n grep eur deepe an. Ôk noe is ze wier ôônder de indruk van alles wat er gebuurd in het veere Hoolt’n. Zelf hef ze ôk pas een book eschrèèm’n. Land van vele bruggen. Het dut een beukske lös oaver de narighèid en de belèèveniss’n van eur femilie in en noa die oorlogsjoar’n. Warkelijk de meuite weert. Zie eindigt eur bericht met een bedankje en “Petje of vuur Hoolt’n.”

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.