• Evenementen
  • Holtense IndexVernieuwd
  • Smidsbelt webcam
  • Leven in Holten
  • Contact
  • Evenementen
  • Holtense IndexVernieuwd
  • Smidsbelt webcam
  • Leven in Holten
  • Contact

Àmoa wat van ’t stokvisnat

Vroagt miej neet woet het vedan kump. Moo gebruuk’n het vaake as ter wat verdeeld môs word’n. Disse wekke wörd’n de zetels in de tweede kamer verdeeld. Het was neet moeilijk te vuurspell’n wiet ’n grötst’n zôl word’n. Iedere tien minuut’n kwam Rutte in beeld, um toch vuural te zegg’n daw we môss’n stemm’n. De zèumtigplussers wörd’n of eschildert as imbiciel’n. Het stemm’n per brèèf was toch wal hèèl arg moeilijk. Ach precèènt van de stemm’n ongeeldig. Gelukkig bint ze doar uut ekömm’n en telt zôvölle mèugelijk stemm’n met. In een gevecht um de tweede plaatse kwam Kaag keihard in anvaring met Wilders. Zie vleuig’n mekaa nog net neet in de heure. De pertiën op de linker kàànte zôll’n der better an doon um saam’n te doon. Zie spölt mekaar noe hatstekke uut mekaa. De PvdA hef ne geweldigen slinger emaakt. Nog altied liedt ze ôônder het kiezersbedrog, duur met te regeer’n met de VVD. Het CDA zag die bujje hang’n. Zie hadd’n eigelijk twei liesttrekkers, Hoekstra en Omtzigt. Den lest’n môs prebèèr’n um de boer’n nog een betje binn’n boord te hôold’n. Zô zak ie of noar de kleindere pertieën. Het Forum, zie hadd’n goold in hàànne, mar op één of ààndere menèère hebt ze de smerige wasse buut’n ehang’n. Het spuit’n alle kàànt’n op en de versplintering vleuig oaver het hèèle Binnenhof. Wat van de politici bint à meerdere kèèr’n verààndert van pertieje, zie möt en zölt in de kamer. Het lik ter mangs arg op det ze der vuur zichzelf zit, zô as de wind wèèit, wèèit mien jäske. Wie is noe vieftig plus, Henk Krol of de Liane den Haan. Ie wordt er kruusdol van. Forum gung as enigste pertieje ’t làànd in. Zie loat oe kiez’n tuss’n corona en vriejhèid. Lekker is det, mà ja, ôk det is democratie. Kortumme het blèèf spannend. Dan um nèèng uur, de èèrste vuurspelling. De VVD en D66 kômt er uut as de grôôte winnaars. Vuural D66 stijgt met stip en of de boer’n doar zo bliej met bint, köj’ oe ofvroag’n. Een troost is det ze an ‘t eine van oamd toch met éénen zetel noar de kamer komt en det geeldt vuur meerdere nieje pertieën. Het CDA krèèg het deksel lillijk op de nèuze. Forum was ôônder e dökk’n, ma det kwam netuurlijk duur de oamdklokke. Met vèèrkàànte ôôg’n van ’t kiek’n zeuke wiej het berre op. Doar is nog gen uutslag te gèèm’n. De versplintering is grôôt en Nederlàànd hef ne grôôt’n stap noar rechts emaakt, mà kan der niks met. Het lik ter op det het gezegde van moo disse kèèr hèèmoal opgeet. Àmoa wat van het stokvisnat.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom terug!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.