Àmoa op noar ’n Diekerhook

Eindelijk mag het wier. Met mekaa noar het Diekerhookse feest. Het is te hopp’n det de Splôôder de weg nog wèèt. Één vuurdeel, Diekerhook lig nog op dezelfde plaatse.en de munt’n bint nog geeldig. Alle gekhèid op ’n stökske, het wördt wier ôôlderwets gezellig, met op vriejdagoamd de de revue, “Dat löp wà lös”. Natuurlijk is ter dan op zoaterdag de optocht, den begint biej de mölle. Wie geet er met de prieze striek’n? As de stoet de feestwèire op kump, könt de Diekerhookers hèèmoa lös. De zoaterdagoamd is vuur de feestvierders uut de hèèle buurte, met as hèugtepunt de Allstarz. Het mag een wôônder heet’n, as de tèènte blif stoan. De euldern zölt het neet te laate maak’n, want ’n ààndern männ’n möt ze met mekaa an toafel. En eindelijk. Ja zie bestoat nog. De Hoolter Korhaan’n, zie treedt noa drei joar vuur het èèrst wier op biej de Diekerhookse brunch. Met de eeg’n band zölt zie as vanôôlds het hèèle repertoire ofwark’n. Het middagprogramma lug ter ôk neet umme, met as hèugtepunt, volgens traditie, Boh foi toch. Op zundag hooj’ het um ’t geeld neet te loat’n. Iedereene kan der vuur niks in. Kiekt het hèèle programma mar is good duur, doar zit vaste wal iets biej, wat oe trekt. Is het neet vuur oe zelf, dan wà vuur de kleintjes of de ôôle lèu. De zommer steet vuur de duure, de feest’n riegt zich anééne. Het Goorse school- en volkfeest steet noe op de lieste van het cultureel arfgood. Van ôôlds an hebt ze doar kômmenden zundag ne grôôts’n optoch, met as hèugtepunt, de rally. In ôônze kinderjoar’n gung’n wiej der vanuut Hoolt’n op de fietse noar touw. Det was altied nog ne hèèl’n klim um, doar tuss’n Markel en Goor, oaver den bult te kômm’n. Zô trökke wiej alle katt’nkarms’n langs met as grôôte ofsluuting de Battemse Karmse. Doar woer op de moandag zo’n betje half Hoolt’n was te vind’n op de kleinvèè- en rommelmarkt. Mennigeene hef doar goeie herinnering’n an. Klaas, die doar vanalles an de man brach vuur ziene bleute van kinder, Ab diet biej het scheid’n van de markt alle kipp’n opkoch en Broer diet met ne ponny mill’n in ‘t café stun. Wat een feest en wat een wille. Gelukkig heiw we noe in Hoolt’n ôônze Kèunefeest’n. Begin september is het wier zo veer. Hoppelijk det er dan gen beparkende moatrèègeln bint, want doar heiw we ôônderhàànd genog van ehad. Wie hôôlt de mood er in, èèrs mar is volop snoem’n an het Diekerhookse feest. Völle wille