voor Holten, door Holten

Zô is ’t beslött’n

0

Mangs heur j’ nog wal is wat op ne vergadering, aj’ oe oor good te lustern legt. Ie dèènkt biej’ oe zelf, hoe is ’t mèuglijk. Ie dèènkt biej’oe zelf, gebuurt det op nen eerlijke meniere. Is det noe rëeel of klopt det neet. Wat miej’ zô bèèzig heult is de bosschôp det de Darpstroate met de Kerstmark neet of e slött’n zôl meug’n word’n. Wat miej nog meer an het dèènk’n zat, was det det nôôit meer zôl gebuur’n. Det breg ne hôôp vereniging’n en organisatoor’n in de prebleem’n. Een kèèr of wat in ’t joar geet die stroate dichte en det veult hèèl plezèèrig en hastekke veilig an. Juus die veiligheid schient ter de oorzaak van te wèè, det het vanof noe, of e leup’n is. Het schient det ter ne zeek’nauto de weg kwiet is e raakt, duur die ofzetting’n, diet ter bint e wes. Doar veuilt wat vuur te zegg’n. Toch köj’oe of vroag’n of dit het peerd achter de waag’n spann’n is. Kan het ôk weer det as die zeek’nwaag’n op de hèugte was e wes, dette dan de weg wal had e vunn’? Het blieft vroag’n, woe ‘k gen antwoord op hebbe. Wà köj’bekiek’n det het völle gedoo gif vuur allerlei feest’n diet ter in ôôns darp wordt organisèèrd. Bekiekt mà vuur oe zelf woet de veiligheid het mèèste met e deent is. As dit ne rèègel is diet e stelt is, zôl het môôi wèè, as ’t vuur iedereene in de gemeente zôl geeld’n. Het zôl ôk môôi wèè, aj’ zukke dinge in de kràànte könt lèèz’n. Kennelijk is det neet zô, want gen eene van de lèu wus ter wat van. Ik heur’ oe dèènk’n, hoe möt det dan biej de triathlon, de carnaval, koninginnedag vief mei en goat zô mar een zetje vedan. Wiej zölt het zee. Één dinge mag helder wèè, gelieke monnikk’n, gelieke kapp’n. Dèènkt ter mar is röstig oaver noa. De decembermoand is wier in ’t làànd. Tied vuur Sunterkloas, tied vuur Karsfees, tied vuur ôôld en niej. Tied vuur bezinning wat het nieje joar ôôns zal breng’n. Het belangriekste is völle gezôôndheid, plezèèr en geluk. Al het ààndere kump op de tweede plaatse. Één van die dinge is het gegèèm’n, daj’ in meert hen stemm’n goat. Dèènkt neet det oene stemme der neet tut dut. Het is een grôôt rech, woet keihard vuur e vöch’n is. Blieft ter gebruuk van maak’n. Ie zölt het pas miss’n, as ’t ter neet meer zôl wèè. Wis en waarachtig.

De Vèèrkàànte Viefkop.

 

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link