voor Holten, door Holten

Zie schreeuwt van moord en bràànd

Wekk’nlàànk heiw we het gescheel van Trump en Clinton mött’n anheur’n. Àj’ der noar lustert kriej’ zô of en touw ne smerige smaak in de môônd. Loaw we hopp’n det de Amerikaan’n de juuste keuze goat maak’n. De èèrste uutslaag’n bint binn’n, vèèr stemm’n vuur Clinton en tweie vuur Trump. Ôôndertuss’n wordt hier ôôns làànd de messe ôk e slepp’n vuur de verkiezing. Biej de PvdA is ter wier ne kikker uut de koare sprung’n. Noe hef de coalitie gen meerderhèid meer in de tweede kamer. Het maakt neet uut, want de oppositie regèèrt de hèèle vèèr joar à met. Biej de PvdA is ’n angel uut ’n voot. Driet in de bokse kan noe in discussie met mieg in de bokse. Ie könt oe ofvroag’n wat de zin hier van is. Het is dôôdzunne det het hèèle linkse geluud van de partië verstörm’n is. Één dingk is vaste, at de oaverblievers de kiezers doar nog met wier kriegt, is det een grôôt wôônder. Op de ààndere kàànte röp ôônzen minister-president, sorry. Hij hef een plan en hij hef zien wark nog neet of. Hij zal op mönn’n pass’n. Ie könt het volk één kèèr vuur de schenn’n trapp’n, mà de mèèst’n loat zich gen twèi kèèr vuur ’n gek hôôld’n. Wiej zölt het in meert volgend joar àmoa metmaak’n. Goat de stemm’n nog meer noar rechts of links. Rekkent er op det de bèire flàànk’n zich loat heur’n. Het modder smiet’n zal der neet minder op word’n. Het steet àmoal in de sterr’n e schrèèm’n. Politiek, ie möt er vuur duur e leert hemm’n. Het is vuur de gewone man neet te duurgrôônd’n. Het gewone volk gif signaal’n of en die wordt duur de politiek, noar eeg’n inzich, vertaald. Zie zit in de tweede kamer daagenlàànk te proat’n, mar in Brussel hebt ze klokke à lange liek hang’n en zit ze te gniffeln um det genèuzel in Den Haag. Het vertrouw’n van de lèu is veer te zeuk’n. Toch is het nog neet zô arg as in Turkije, ôk al steet er hier eene vuur de rechter, vuur hetzelfde as wat in Amerika wördt eschreeuwt. In Turkije wordt hèèle groep’n politici op e pakt, umdet ze van nen ààndere pertieje bint. Uuropa heult zich angstig stille um toch vuural mà gen heibel te krieg’n. Duudelijke signaal’n, doar zit de lèu op te wach’n. Verkiezingsproat, doar heiw we de leste moand’n vanuut Amerika genog te heur’n e krèèg’n. Minder Moslims en een iezer’n gerdien tussen de Mexico en Amerika. Kromme tèène kriej’ der van. En dan geet het in ôôns darp oaver het lös doon van de winkels op zundag. Gelukkig, vanof 12 november heiw we in Hoolt’n wier ne niej’n Prins. Ne wekke later stoat ôk Sunterkloas en Zwarte Piet wier op ’n Smidsbeelt en met een betje geluk vlug de Karsman ôk nog duur de stroate. Niks an de hàànd, blieft vuural geniet’n.

Wis en waarachtig.

De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link