• Evenementen
  • Holtense Index
  • Smidsbelt webcam
  • Leven in Holten
  • Contact
  • Evenementen
  • Holtense Index
  • Smidsbelt webcam
  • Leven in Holten
  • Contact

Wegens rijkdom gesloten

Het is à wier nen eeuwighèid elèène daw we richting de Bôône gung’n. Ik kwamme der neet länger ôônderuut, noet die verrekte môôndkäpkes neet meer ophooft. Gelukkig, want die lôch van nieje kleere maakt oe toch altied à benäuwd. Het eenige woej’ doar van könt geniet’n, is het lekkere köpke koffie. De rèize der noa touw gung vuur de wind, allèène mark ie à duuvels good, det het wier drôkker en drôkker wördt. Noa een dik half uur is de waslieste of ewarkt. Het heul der nog à vuur. De kèuze tussen een paar blouses was ne brugge te veer. Uutèindelijk heiw we ze bèire mar ekoch en kôw we op noar de koffie. Wat een geluk, doar kwamme wiej de ôôle schouwmaker en buurjonge tèèg’n. Hij kek miej noar de schoone en zeer, eccoos. Nog altied vakman hè. Het gesprek brach ôôns in die ôôle tied. As ie de hakke van’n schouw hadd’n, stuurd’n ze oe vanuut de winkel duur noar de schouwmakerieje. Doar zatt’n de keerls, nog twei man stark, schoone te repperèèr’n. Het is een vak wat in Hoolt’n is uut estörm’n en dan te wèèt’n det er in die tied’n, drek noar ’n oorlog, op wà vèèr plaats’n schoone wörd’n vermaakt. Nieje schoone krèèj’ àllèène at oe de ôôld’n neet meer pass’n. Vaake àllèène mà zundagse schoone,want duur de wekke hen leup ie op klumpkes. Ôk nieje klôômpe kwamm’n der allèène mà, àj’ze tut op’n droad verslett’n hadd’n. Had ie de pech, det met het voetball’n, oe de kappe van de klôômp vleuig, dan zett’n vaa der wal een dreuidje oaver hen en môj doar met vedan. Vaake hè ‘k in de warkplaatse estoane en noe nog kump die aparte leerlôch wier noar boam’n. Ie stunn’n der met ’n nèuze boamnop at de schouwmaker, de schouw vakkundig ôônder de nèèimechiene hen haal’n, zôdet de tonge wier vaste zat. Klèine reparaties, ie konn’n der opwacht’n en ààns môs ie, met een dag of wat wierkômm’n. Schoone loat’n maak’n, het gebuurd völle minder as in die vroggere tied’n. Het kan nog wà, mà dan wördt het uutbestèèd. Het gesprek en de tied vleuig vuurbiej. Nog èèm’n in de riege, op àànderhalm’n meter, pinn’n en op huus an. In de auto kom ie der pas achter wat de kost’n bint. Biej de Bôône kan een bordje op de duure, wegens rijkdom gesloten, mà de koffie was gratis en vuur niks.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom terug!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.