• Leven in Holten
  • Contact
  • Leven in Holten
  • Contact

Vuur de èèrste kèèr nieje eerpel

2
GEDEELD

Het is à wier een tiedje trugge, det de èèrst’n in ‘t schap lagg’n. Geschrapt en al. De hèèle vuurgoande geschiedenis geet langs oen hen. Het umme ploog’n van ’t làànd tut an het eerpel gardern. Ne ploog haw we zelf neet, mà wà ne buurman diet det joar in joar uut vuur ôôns dèu. Noa het ploog’n môs ie der oaver hen met de egge um het môôi glad te krieg’n. Det gung het beste met een peerd vuur de egge, mà de ôôle buurman was nog zo stark det e zelf, vuur de egge, het làànd glad maakt’n. De grôôte dag van het eerpel pott’n. Vaa gung met de eerpelstikke op de nekke achter noar ’n Kààmp. Met groote stapp’n pott’n hij, biej iedern trad, vèèr geater in de grôônd en een markèèr stipke vuur de volgende voore. Zô gauw at de èèrste rieg’n ezet wadd’n, môgge wiej beginn’n met eerpel pott’n. Emmerke in de hàànd en dan mikk’n ie de poteerpel ééne vuur ééne in de gèètjes. Good mikk’n, ààns môs ie der wier biej um te zörg’n det de gèètjes netjes wörd’n evult. Zô was de hèèle femilie gangs um de eerpel der in te krieg’n. Tèèg’n en uur of tiene kwam opoe met ne kanne koffie en ne flesse ranja en wörd’n der gezamenlijk èèm’n eröst. An ’n èinne van de middag zatt’n de eerpel der in. Opa was dan à begunn’n met het eerpel sloff’n. Det was een secuur en zwoar wark, want neet allèène mônn’n de eerpel der ôônder, de voor’n môss’n ôk nog een betje liek en rech wèèr. Het wark was edoane en noe wacht’n op de nieje eerpel. Det was biej ôôns nôôît vuur ’n vèèrtien’n juli. Woerumme, ik wèèt ’t neet, mà dan was de ôôle buurman jeuirig. Vuurdet ’t zo veer was wörd’n wiej meerdere kèèr’n het eerpellàànd op e stuurt, um de coloradokèèvers der of te haal’n. Zô gauw àj’ een jampötje vol hadd’n, gung ie, met gelle vingers, noar opa, um den beloafden stuuver op te haal’n. Good de hàànne wass’n, want die kèèvers wadd’n giftig. En dan eindelijk 14 juli. Vaa gung het làànd op um de èèrste eerpel te stekk’n. Twei strôônk en hij had al een meuiltje. “Beste eerpel dit joar” heur’n ie dan. De eerpel wörd’n of ewass’n en met nen ôôld’n klôômp gung de argste velle der of. Natuurlijk kwamme wiej ôk wier an de buurte, eerpel schraap’n. Gen fijn wark, die rot velle blèèm’n oe an de hàànne plakk’n, mà de beloning was ter noa, vuur de èèrste kèèr, nieje eerpel met smallook, oh wat lekker, noa al die ôôle eerpel.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.