Van Stien van de Vijzel, Wedda en dokter Kolff

0

Stien, getrouwd met Cappie van de Stökker had in het allerèèrste begin ne drogisterieje in één van die ôôle boer’nhuuskes an de Oranjestroate. Wiej kwamm’n der àllèène mà vuur zeut hoolt. Later zat doar Schooneveld nog, met tillevisies. De Vijzel verhuusd’n noar de ààndere kàànte van de weg. Toen al wark’n door Han Kraan in de winkel van Stien. Ik lèèz’n det en een ôôld verhaal borreln op. In de allerèèrste plaatse dut het merakels good, te heur’n det de Wedda mèugelijkheed’n zut, um vedan te goan. Wiej möt det wardèèr’n en die winkel neet vuurbiej lôôp’n. Doar bint à te völle vertrouwde winkels vôt uut het Hoolt’nse. Vieftig joar in Hoolt’n, det is neet niks. Loaw we hopp’n det disse en de volgende generatie der nog is vieftig joar biej an dut. Um trugge te kômm’n biej Stien van de Vijzel. Zie was een zuster van dokter van de Ridder. Dokter van de Ridder hef heel lange in Genemuud’n ewônt, saam’n met Maria Meuldijk. Uut de môônd van Maria heur’n ik ruum elf joar gelèène, het môôie verhaal van eur lèèm’nsloop. De schoonzuster van Stien wörd’n toen honderd en wonn’n toen à ruum 33 joar op ’n Diessenplas. Saam’n met eur man had ze ne huusarts’npraktijk ehad in Genemuud’n. Zie blèèm’n zôônder kinder en doarumme blèèf zie de apotheek en de bookholding doon. Zie raak’n vuur ’n oorlog à bevriend met dokter Kolff, dent in Kààmp’n op ’t zeek’nhuus wark’n. Toen, in ’n oorlog, dokter van de Ridder in ’t verzet gung, net as zien moat dokter Kolff, wörd’n hij meerdere kèèr’n op epakt duur de Duutsers. Hij kwam in wà zèum verschillende gevangeniss’n. Tussentieds kwam e nog een tiedje vriej. Zô stun het echtpaar de Ridder in de harfs van 1943, saam’n met de latere wereldberoemde dokter Kolff, noar de allerèèrste nierdialysemechiene te kiek’n. Starker nog, zie hebt er zelfs met mekaar an ewarkt. Nen uutvinding diet in latere joar’n miljoen’n en miljoen’n mèèns’n het lèèm’n hef ered. De Ridder wörd’n an’n eine van n’oorlog wier vast ezet en emartelt. Gebrökk’n en zeek kwam e noar huus. Hij wörd’n ôônderzoch duur zien kammeroad, professor doctor Willem Johan Kolff en den constatèèrn tbc. Op vuurspraak van dokter Kolff, môch hij noar Davos. Hij kwam der boam’nop. Toen dokter Kolff in 1950 vreug, um met ‘m met te goan noar Amerika, hebt ze det neet edoane. Zie blèèm’n in Nederlàànd en kwamm’n zô uuteindelijk trechte biej eur femilie in Hoolt’n, Stien van de Vijzel.

Holtens weekoverzicht
Abonneer je op ons weekoverzicht en ontvang het laatste nieuws elke zaterdag rechtstreeks in je inbox
Je kunt uiteraard altijd weer afmelden!

Laat een antwoord achter

Uw e-mailadres wordt niet gepubliceerd.

Deze website gebruikt cookies om uw ervaring te verbeteren. AccepteerLees meer