• Leven in Holten
  • Contact
  • Leven in Holten
  • Contact

Storm uut ’t Noord’n

2
GEDEELD

Vrog in de männ’n schrik ie wakker. Wat is det dan? Motoor’n kômt vanof de grèènze, met völle lawaai, het darp in. In de veert’n heur ie zwoare ontploffing’n. Ie möt vervat wèèr op zwoare tied’n. Wat gen mèinse edach had, gebuurd noe. Met man en mach wördt er ewarkt um de machtige vijand tèèg’n te hôôld’n. Het is onbegunn’n wark, toch is ter völle verzet tèèg’n dit grôôte onrech. Bèume wordt daale ehaalt, brugg’n wordt op ebloaz’n. De suldoat’n verzamelt zich um de ongelieke stried an te goan. Het geluud van zwoare ontploffing kump noe van alle kàànt’n. Vliegtuug’n vleegt oaver, woer goat ze hen? Het geroas en gerôônk blif anhoold’n. Dit lik toch wal nen gruwelijken lang’n trein. Dan, akelige ontploffingen vlak biej. Glas vlug uut de sponning’n en meerdere huuze wordt kapot eschött’n. In één kèèr suldoat’n in t darp. Het gemeentehuus wördt bezet. De èèrste beveel’n klinkt duur de stroate. Met grimmige gezicht’n trekt de colonnes, kilometers làànk, op noar de hoofdstad. Sympathisant’n wiest ze ôk nog is, woer ze hen möt. De eindeloze rieg’n marchèèrt vedan. De teinrails wordt kapot emaakt. Het helpt niks. Zie loat zich neet tèèg’n hôôld’n. Doar wördt hard evöcht’n en de èèrste slachtoffers kômt trugge van het slagveeld. Zô zölt de Oerkraïeners zich noe veul’n. Is ter mar iets wat dissen onzinnigen oorlog kan tèèg’nhôôld’n. Wat wil Ruslàànd met een plat gebombardèèrd làànd, woer de bevolking uut weg is evlucht? De gruwel’n stapelt zich dag noa dag op. Blif het biej de Oekraïne of raakt er hoe lange hoe meer làànd’n biej betrökk’n. Loaw we astebleef hopp’n van neet. Zeg neet, det het neet kan, want dit verhaal begun neet met de bezetting van een darp in de Oekraïne, mà beschrif de èèrste dag van de bezetting van ôôns eeg’n darp in vèèrtig. Net as toen, raakt mèèns’n noe de vriejheid kwiet. Alle daag’n valt er duuzenden slachtoffers, alle daag vleuit er meer blood. Ôôns làànd wörd’n in vief daag’n ôônder de voot eleup’n. De oorlog doarginds duurt à meer as ne wekke en geet nog met alle krach vedan. Loat wiej hopp’n det het gauw vuurbiej is en det het geweeld stopt. Ie möt er toch neet an dèènk’n, det wiej de suldoat’n, net as in vèèrtig, wier duur ôôns darp zeet goan. Loat ze astebleef rap met mekaa goan proat’n, want de weg trugge wördt als mà länger en zwoarder.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.