• Leven in Holten
  • Contact
  • Leven in Holten
  • Contact

Plat proat’n, plat goan en plat legg’n

0
GEDEELD

“Is disse kippe van oe?” Zô kump de börgemèister, met ne dôôie kippe biej de Veeldwachter binn’nstoem’n. Plat e rèèdne, zo plat as ’n dubbeltje. De wethôôlder kik ze bèire an en zeg platweg, “Nee, zukke platte kipp’n heb ik neet.” Diss’n bak, in ’t plat is gen ne platt’n bak en iedereene hef ‘m vaste wal is e heurt. Wat iedereene misschien nog neet hef e heurt, is det in meert, het plat wier volop in de schijnwerpers steet. Zelfs de gemeente dut er an met en heult, op één’ndartig meert, de roadsvergadering in ’t plat. Det zal wà wier ne hèèl’n zit word’n. Wie zôl der disse kèèr de road wier plat proat’n. Zô gauw at ze achter de platte pette bint e wes, könt er drek een paar roadsleed’n plat goan want, van plat, doar verstoat ze niks van. Doar bint er wat, die hebt er nog meuite met um zich in het Hollàànds te uutern, loat stoan det ze plat könt verstoa en begriep’n. Wier ààndern, diet dèènkt det ze plat könt, valt noa twei rèègels, plat op ’n snoet’n. De helfte van de road lig dan à plat van ’t lach’n en de ààndere helfte kik, of ze ’t in Keul’n heurt dôôndern. Het is rechtervoort niks ààns as bezuunigen biej de gemeente. Zie gèèft niks meer vôt. Ie könt er de duure wà plat lôôp’n, mà ik zeg ’t oe plat vuur ’n kop, zie bint platzak. Het zal ne zoer’n oamd word’n vuur wat Hoolter. Het belangriekste ôônderwarp, is de vaststelling van het Kolplan. ‘N hèèl’n Kol lig ôôndertuss’n à plat. Doar steet gen steen meer op ’n àànder. Plat e zeg, het is één’n grôôt’n puinzooi. Ik heb e heurt det Hoolter, speciaal vuur disse vergadering, ne kursus Riessens hebt e volgt. Det möt ôk wà, want zie proat e van alle sôôrt’n plat duur mekaar hen. Ja en at er dan in één kèèr oaver schakelt wördt van Hoolt’ns noar Riessens, net as ’t er platweg op an kump, dan verstoaj’ ’t nog wà, mà begriep ie der niks meer van. Het is ééne grôôte Babylonische töuiwtrekkerieje, ie zôll’n der platveute van krieg’n. Zie hebt er ôk nog ne pries vuur. Vuurig joar gung de platproaterspries noar Bert Tijhof. Zien plat was het beste te verstoan. Dit joar gok ik ter op det Jan van Grieze met ’n beker op huus an geet. Det möt könn’n, at e is ne kèèr, ôôlderwets plat, uut ’n hook kump. Aj’ vrog plat wilt, umdaj’ ’n ààndern dag wier vrog uut de veer’n möt, ie könt de vergadering ôk as hoorspel lustern op de radio van 350. Het zal oe neet verveel’n en ie hooft er neet gek van op te kiek’n aj’ plat van ’t lach’n vuur de radio ligt. Plat, het blif môôi, plat proat’n, plat goan en plat legg’n. Wis en waarachtig.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.