voor Holten, door Holten

Pinkstern en Poas’n

Pinkstern en Poas’n völt nôôit op één’n dag, mà hemelvaart en bevrijdingsdag wà. Doarumme zat ik miej op hemelvaartsdag mar is vrog buut’n op ’n stool. Het weer was ter noa. Ik wol al die dauwtrappers wal is zeen. Um acht uur zat ik à lekker in het zunneke. Mien gedeuld wörd’n zwoar op de proef e stelt. Een uur later hà ‘k nog gen trapper e zeene. Wà ‘k misschien te laate wes? Het wörd’n ne lang’n männ’n. Pas tèèg’n half elme kwamm’n de èèrste fietsers der langs. Wat miej opvöl was toch wà het hôôge griesgehalte van die dauwtrappers. Het was de meuite van ’t kiek’n eigelijk neet weert. Zô duukeln ik in gedach’n weg in de vuurjoarszunne. Wie wadd’n dauwtrappers van het èèrste uur. Koppels fietsers kwam ie intèèg’n en op de terrass’n zat het oaverà mudvol. Ààndern gung’n der met de auto op uut. Den wörd’n dan argens langs de grôôte weg e zet en zô kônn’n ze geniet’n van al die lèu, diet met ne grôôt’n krààns tulp’n wierkwamm’n vanof de “Keukenhof”. Ie zeet het neet meer, mà de auto’s met tulp’n rèèd’n achter mekaar an duur Hoolt’n. Klein’n Teunis was ’n eenigsten dent hard môs wark’n, want de lèu stun in de riege biej ziene benzinepôômpe. Van de A1 had gen mèinse nog e heurt. Alle verkèèr kwam duur Hoolt’n. Het was ter zô drôk, daj’ vaake de grôôte stroate neet oaverkwamm’n. Lèèmn’sgeveuirlijk, met de rèègelmoat van de klokke gebuur’n der ongelukk’n. Ik schrökke wakker van het lawaai van motoor’n diet in ne lange riege biej ôôns langs schött’n. Doar zat ik noe net neet op te wach’n. Woer blieft die koppels jonge lèu, diet gezellig lawaaimaak’nd en slingerend eur weg zeukt noar het volgende terras. Het is neet meer. Ôk de bloemboll’nslingers bint weg uut het stroatbeeld. Het grôôte verkeer roast gelukkig oaver de A1. Op ’n Hoolterbarg, doar wilt de lèu nog wà weer. Lekker op ’t terras of net as vrogger op bezeuk in het museum van Piet Bos. De :aäpe en en de papegaai’n bint vôt, ma veerder is ter nog genog te zeen. Wat zeg ie biej der de leste joar’n neet meer e wes. Het wördt tied, het Niemendalletje is nog altied èèm’n stijl. Àllèène kom ik ter noe neet meer zô makkelijk tèèg’nan. Ôk het Kolkje is ne vergett’n plaatse um is röstig hen te fiets’n, of iets veerder noar Palthe ôônder langs ’n barg. Môôie keerl, zöj’wà zegg’n, Pinkstern is à vuurbiej. Det is woar, mà doar komt nog môôie daag’n zat. Goat is een kèèr wier kiek’n en ie hebt dan pas good in de gaat’n, hoe môôi of het rondum Hoolt’n is. Goat mar is op zeuk noar Klein Zwitserland, het Dikkersbuske, de feesbèume of de diepe hel. Doar biej meer as ne dag met gangs en ik bin bange daj’ sommige dinge neet wier vindt. Arg jammer, mà der is nog genog oaver. Wis en waarachtig.
De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link