• Leven in Holten
  • Contact
  • Leven in Holten
  • Contact

Op noar de verkiezing

2
GEDEELD

De kômmende daag’n zöj’ ze wier zeen, de keerls en vrouwlèu uut de gemeenteroad. Zie zölt her en der stoan, met penn’n en àànder materiaal, um te prebèèr’n, oe oaver te haal’n, hun pleitske op de lieste an te kruuz’n. En nemt van miej an, het is belangriek. Één moal in de vèèr joar is ter de mèugelijkheid um de gemeenteroadsleed’n te kiez’n, diet oe goat vertegenwoordigen. Bint er zaak’n neet uut e kömm’n, bievuurbeeld de sluutingstied’n. Bint er gen huuze genog ebouwd, is oe de herindeling van het centrum neet noar de zin, of zit ie met de windmöll’ns in de maage. Doar völt wat te kiez’n. Kortumme kiest die pertieje diet het beste biej oe past. Die gedacht’n gung’n duur miej hen, toen de grôôte verkiezingsposters miej ankekk’n. Verkiezingstied altied wier biezunder. Het is gek, ongeveer op dezelfde plaatse van die grôôte plakaat’n, stun der ôôit, in toen nog ne weire, ne poster van Pieter Oud. Het is miej altied biej e blèèm’n. Woerumme, gen idee, mà biej het noazeuk’n kom ie der achter, det e an de weege hef estoane van meerdere pertiej’n. Argens an de weg noar Tubbarg’n steet ôk nog een beeld van Dr Schaepman. De ôôle lèu preut’n altied vol ontzag oaver diss’n keerl. Hij was eigelijk priester en kwam in die hoedanighèid, as èèrst’n geestelijken, in de tweede kamer. Vuurbeeld’n uut ne lang vevleuig’n tied., Dit was de landelijke politiek. In ôôns darp was het vaake een nek an nek race tuss’n de Christelijk Historischen en de Anti Revolutioneer’n. Netuurlijk is miej altied biej e blèèm’n, de plaatselijke verkiezingsleus van de PvdA, “Gen geouwehoer, stemt op Soer”. Joar’n later moch ie dan eindelijk zelf hen stemm’n. Opoe drukk’n oe op het harte, wàj’stemt, möj zelf wèèt’n , àj’mà goat. Noe was ter in die tied nog opkomstplicht, gen stemplicht, dus ie gung’n wà. Àj’ neet gung’n, stun doar ne boete op. Die opkomstplicht is neet meer. Mà het stemrecht is gelukkig eblèèm’n. In de joar’n zestig stapp’n de èèrste noa oorlogs generatie noar de stembusse, teglieke met de oprichting van D66. Het môs ààns, het môs better. Of ter wat verààndert, het lig uutèindelijk an ôôns, de kiezers. Één dinge steet as ne poal boam’n water, àj’ neet stemt, geet oen stemme verleuirne en möj’ wier vèèr joar wacht’n en stille wèèr. In disse tied van bruut geweeld an de grèènz’n van Uuropa, besef ie, eens te meer, wat vun vuurrecht of het is, um oen stemme te loat’n heur’n.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.