• Leven in Holten
  • Contact
  • Leven in Holten
  • Contact

Loat oe gen oor annèèi’n

2
GEDEELD

De èèrste kèèr dàj’ las hadd’n van de oor’n, ie verget het nôôit wier. Huulend zit ie op ’n stool. ’N hèèl’n dag heij’ à ne zeurderige oorpiene. Het is neet te hard’n en dan möt het gebuur’n. Moo zet een pänneke met sloaöllie op de kachel en at het good op temperatuur is, möj’ met het heufd op de toafel goan ligg’n. Vuurdàj’ der arg in hebt göt ze oe det keiheete spul in’t oor. De öllie golft noar binn’n. Ne stekkende piene trek oe duur ’t hèèle lichaam mà gelukkig, noa een tiedje trek de piene weg. Gelukkig ja, want die kokkendheete oordröppels, det wil ie gen tweede kèèr metmaak’n. Een àànder vuurval det oe is biej e blèèm’n, de juffe op schoole trök oe biej de oor’n uut de bàànke. Ne dag eerder hàj’ een dictee met noar huus hen ekrèèg’n um te leer’n. Ôônderweg schuur’n ie het papierke kapot en det wörd’n duur één van de getuug’n èèm’n duur ebrèèft an de juffe. Vuur ’t ôôge van de hèèle klasse wörd’n ie an de oor’n uut de bàànke etrökk’n um, met uutgeschuurde oorlell’n, an de schandpoal te word’n enèègelt. De dader van det verroad is nôôit mien kammeroad meer ewörd’n. Oor’n, wat bint er ne hôôp gezegdes oaver de oor’n. Àj’gauw helg bint, heij’ de oor’n kort an de kop stoan. Àj selectief lustert binj’ Ôôst-Indisch dôôf. Àj’ van ’t padje bint, zit het neet good tuss’n de oor’n. Goaj’ onduurdach het internet op, dan könt ze oe mà zô een oor annèèi’n. Dus kiek uut, det ze oe het vel neet oaver de oor’n haalt. Grôôte mèèns’n möt oppass’n wat ze zegt at er klèine wichter in de buurte bint, want klèine pötjes hebt grôôte oor’n. In disse tied van Sunterkloas möj’ oe stille hôôld’n, want vuurdàj’ der arg in hebt wast ze oe de oor’n, biej het zeen van al die gekluurde Piet’n. Ja, àj’ de geschiedenis neet kent bin ie nog neet good drèuge achter de oor’n en köj’ der neet oaver met proat’n. Ôôndertuss’n zit ie nog met det onverwarkte gebuur’n van die opgeschuurde oorlell’n. Biej huus krèèj’ ôk gen hulpe. Ie zölt het er zelf wà noa hemm’n emaakt. Wat det betreft bint de tied’n veràànderd. De mèisters en juffes van noe krabt zich wà twei kèèr achter de oor’n, vuurdet ze ôk mà met ne vinger wiest noar ôônze prinsjes en prinsesjes. Knupt het àmoa good in de oor’n en loat oe gen oor annèèi’n

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.