• Leven in Holten
  • Contact
  • Leven in Holten
  • Contact

Leny ’s Levens

1
GEDEELD

Machtig môôi weer. De zunne breg oe de vuurjoarswarmte op ’t gezichte. In de veert’n lôôpt de beeste in een môôi vrèèdig greun landschap. Deepe ôônder ’n indruk bin ‘k nog. In ne kort’n tied loa ‘k nog is duur miej hen goan, wà ‘k e lèèz’n hebbe. Het is neet te gelèum’n. Hoe völle kan een mèinse verdrèèg’n. Hoe is ’t mèugelijk det zô iets kan gebuur’n. Het is gebuurt en nog alle daag’n gebuurt er dinge, woej’ van zegt, dit nôôit wier. Ik heb net precies het book uut e lèèz’n oaver mevrouw Leny Polak. Ne gewoone Battumse dèèrne, diet vuur ’n oorlog opgreui’n met de Battummers. In ’n tweed’n wereldoorlog wörd’n ze of e voert, umdet er vuur de Jödd’n gen plaatse was in de dèènkbeeld’n van de Duutsers. Het is ’n verhaal, wàj’ neet met drèuge ôôg’n könt lèèz’n. Het is een book, waj’ möt lèèz’n, um nog is wier dreidonders good te begriep’n wat vriejhèid is. Ie wordt er van duurdrung’n, det die dinge diet gebuurt bint, gen zaak’n bint, woej’ oaver möt nèuzeln. De vriejheid, die we sinds viem’nvèèrtig hebt, is een grôôt good. Wiej stoat er één’n dag in ’t joar biej stille en vaake blif het dan nog mar oppervlakkig. Àllèène doarumme is ’t à good um het book, “Leny’s Levens” te lèèz’n of vuur te lèèz’n. De rilling’n lôôpt oe oaver de rugge, àj’ oe bedèènkt hoe onmeunig zwoar dit vuur Leny möt wèè ne wes. Zie is àllèène wier e kömm’n. Het verdreet hef ze eur hèèle lèèm’n met mönn’n drèèg’n. Het is een wôônder àj’ det könt, op de maniere zô at zie det hef e doane en dut. De stille krach in eur lèèm’n is ne grôôt’n ôôld’n Linnebôôm. Den bôôm gaf eur de krach um duur te zett’n in de duusterste daag’n van eur lèèm’n. Op 10 mei is het twei’nzèumtig joar e lèène det die dôffe ellende begun. De viem’nzèumtigplussers zölt het nog wèèt’n, op ne zun oavergött’n dag kwamm’n de Duutsers zô mà binn’nvall’n. Vief joar later wadd’n der miljoenen lèu diet de vriejheid nôôit wier zôll’n belèèm’n. Die vief joar bint allesbepalend vuur de noa oorlogse generaties. Het is good det ôk de nieje generaties ôônder ôôgn kriegt, wat er àmoal gebuurt is. Hèinig an kom ik uut mien lèèsroes. Den verschrikkelijken oorlog, dent à wier zèum’nzestig joar achter ôôns lig, gif altied wier stof um oaver te bekvech’n. Det mag, det möt en det kan in dit làànd. Wiej hebt de neiging um der oaver te nèuzeln. Vuur daj’ det doot is het good um het book oaver Leny te lèèz’n. Dan kôm ie der achter det het beestachtig is e wes, wat mèèns’n mekaar hebt an e doane en dan möj’ begriep’n det de warkelijkheid nog arger was. De hèure goat oe rech op de rugge stoan, àj’ der an dèènkt. Wis en waarachtig. Het book is te kôôp biej de bookhààndel.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.