voor Holten, door Holten

Het is ech woar.

0

Doar bint lèèzers, diet neet könt gelèum’n det de lèu in de vieftiger joar’n één’n dag met de busse op vakààntie gung’n. Ik zal ’t oe noe starker vertell’n. Het was de Haarjödd’n zô good bevöll’n, det ze ’n joar later wier op stap gung’n. Dit keer noar Limburg. Um half vieve kwam de busse vuur rie en um kwart vuur vieve wörd’n der met mistig weer richting Zutphen e rèèdne. Via Arnhem en Nijmeeg’n gung het richting Maastrich. In Velden gung’n de lèu an de koffie en de cognac. Zô te lèèz’n hadd’n de keerls de cognacflesse à rap leuig. De rèize gung veerder langs Venlo en Roermond noar Sittard. Doar rèèd’n ze um ne koll’nmiène hen, um een idee te krieg’n hoe grôôt of zunne miene was.

Veerder gung het in de richting van Valk’nburg. Jammer genog was de mist nog neet op e trökk’n en kônn’n ze wèinig van het landschap zeen. Half twaalme rèèd’n ze Valk’nburg binn’n en netuurlijk wörd’n der èèrs wat e gett’n en e drunk’n. Doarnoa wörd’n de gemeentegrot bezoch. Deepe ôônder ’n indruk van het zwoare wark det hier ôôit was uut e voert, kwam ze wier noar buut’n en gelukkig, de zunne stun hôôge an de lôch. Der wörd’n nog ne noamaak koll’nmiene bezoch en netuurlijk gung ze met de kabelbaane noaar ’n Julianatoor’n en vedan mà wier in de richting van Vaals. Ôônderweg wörd’n der wier an e leg biej ne forell’nkweekerieje van de Nederlandse Heidemaatschappij. Uuteindelijk kwamm’n ze op het veerste punt, het Drielandenpunt in Vaals. Doar trök net ne onweersbujje oaver ’n barg. Het was hôônneweer en dus wörd’n der beslött’n um mà neet uut te stapp’n. De busse rèè nog wal um de drei grèènspeuile hen, zôdet de Haarjödd’n toch nog in drèi läänne wadd’n e wes. Um half achte gung het wier op huus an. Ôônderweg wörd’n der nog een paar kèèr an e leg en um half ééne ’s nachts, twintig uur noar ’t vertrek, kwam het hèèle gezelschap, in opperbeste stemming, Hoolt’n wier binn’n rie. Det is wat Broer van Sèèns hef op e tèèk’nt. Het bint de leste notuul’n van 1954. Het notuul’nbook begint pas wier in september 1970, met de heroprichting van de buurtvereniging “De Haar”. Wiej möt ôôns mar is wier richt’n op ààndere dinge, zô as de verkiezing’n en wat nog völle belangrieker is, de Kèunefeest’n. Die wordt dit joar vuur de twei’ntwintigste kèèr e heuld’n. Det is ààns gen reed’n um andach an te gèèm’n, mar umdet det feesje organisèèrt wördt vanuut de carnaval, kriej’ te maak’n met het getal elme. De Kèunefeest’n, ôôit ontstoane toen de carnaval 22 joar bestun. Dit joar hebt ze eur 44 joarig jubileum, wat ôôndermeer e viert wördt met ne tentoonstelling in de Oudheidkamer. Elf november wördt het e opent. Het wördt bezunder met fotomateriaal van roemruchte Prins’n, as Waterjan, Jehan van Geenhuuz’n en Berend Willem Dapper. Doar gebuurt wier wat in Hoolt’n, wis en waarachtig.

De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.