voor Holten, door Holten

Hèèmoa van de wieze

Heiw we net achter de rugge det de karsdaag’n verleup’n as poasdaag’n in de vuurjoarszunne, noe möw we, mill’n in het winter, an het carnaval gelèum’n. Hoe völle kan een mèèinse verdrèèg’n. Zes februari de grôôte optoch duur Kèunedarp. Onwillekuurig dèènk ie trugge an 1986. Duur umstandigheed’n wörd’n de optoch verzat noar de moandag. Det heiw we wèèt’n. Temperatuur’n onder nulle en ’n hèèl’n middag giezel. ’n Hèèl’n optocht zat dikke ôônder het ies. De lèu zatt’n à vrog an de borrel. Hier en doar stun der nog ééne te kiek’n. De dorstluchtige Hoogheed’n kwamm’n, zwoar onderkoeld, an op het ôôle gemeentehuus. Doar wörd’n ze op e vang’n met jägermeister en beerenburg. Sommigen raak’n der hèèmoa van, van de wieze. ‘N één’n kon de auto neet lös krieg’n en ’n ààndern môs de roete in houw’n um in huus te kômm’n. Toch hef zôiets ôk wà wat. Dartig joar later köj’ der oaver schriem’n. Loaw we hopp’n det de weergood’n ôôns en dan vuural, iedereene diet met dut, good gestemd bint, zôdet Hoolt’n kan geniet’n van ne môôi’n optoch. Vuurdet het zô veer is, is er èèrs nog “Kèunedarp lacht”. Lèu àj’ noe is wilt preum’n van ne gezelligen oamd, goat dan met een stel bekèènd’n of kammereuie zoaterdagoamd, 16 januari, noar de Poppe. Ie zölt zeen, daj’ der gen spiet van kriegt. Het is nen oamd vuur de jong’n en nog meer vuur de viem’nvèèrtigplussers. Vuur het veerdere programma, kiek mar is in de Fienpreuver, dent disse wekkke biej iedereene in de busse veuilt. Carnaval in Hoolt’n. Hoe is ’t mèugelijk. Dit, van huus uut katholieke fees hef wortel e schött’n tuss’n de Rood zwarters en Blauw witters in Hoolt’n. Oaver de zèumhonderd leed’n en det greuit alle joar’n vedan. Doar möj’ het petje vuur ofnemm’n, in ne gemeente, woet de lèu neet bepaald àmoa langs de kàànte stoat te juich’n. Carnaval is kwetsbaar, doar hooft mà dit te gebuur’n of doar komt opgehèèv’n vingertjes en rèègeltjes biej. Zô of en touw zit de organisatoor’n met de hàànne in’t hoar. Zie wèèt dan ôk neet meer, woet ze het àmoa möt rèègeln. Netuurlijk, rèègeltjes möt er weer. Doar möw we ôôns àmoal an hôôld’n. Mà begrip mag ter ôk word’n verwacht en det zal uuteindelijk wier lukk’n met dissen èèrst’n Blauwwitten prins, Youry de Dominator. Hoolt’n mag ter grèuts op weer, neet allèène de sport verbroedert, ôk het carnaval dreg zien steentje doaran biej. Det is de nieje tied, de tied van de jong’n van tèèg’nswoorig. Met mekaa lèèm’n, weg uut de hukskes, met respekt vuur een ieder zien doon en dèènk’n. Achter de scharm’n bint er 25 commissies gangs um alles in goeie baan’n te leid’n. Hoolt’n is zô gek nog neet. Iedere kèèr stoaj’ der wier versteld van wat er àmoa duur en vuur ôôns op töuw wördt e zet. Raakt neet van de wieze, doar is à armood genog in de wereld, wis en waarachtig.
De Vèèrkàànte Viefkop.

Reacties zijn gesloten.