• Leven in Holten
  • Contact
  • Leven in Holten
  • Contact

Haa Em Vee

0
GEDEELD

Völle verstàànd hè ‘k ter neet van. Eerlijke volg ik ze ôk neet alle daag’n. Zie bestoat à hèèl lange (1922) en noa ’n oorlog bint ze saam’n e goane met Excelsior (1927). In die tied was de lèèm’nsopvatting tuss’n de beire orkest’n arg verschillend. Det möj’zelf hemm’n met e maakt, ààns köj’ det neet begriep’n. Vuur ’n oorlog stunn’n ze mekaa mangs noar ’t lèèm’n. Toen de börgemèister, Baron van de Borch van Verwoolde zien viem’ntwintigjoarig ambtsjubileum had (1933), spöll’n ze dwars duur mekaar hen. In ’n oorlog môss’n ze van armood wà met mekaar saam’nwark’n tèèg’n de Duutsers. Het schient det er toen ééne nen opmarking hef e maakt, det ze noa ’n oorlog met mekaar duur Hoolt’n zôll’n goan um de bevrijding te vier’n. Zô is ’t e goane. Op 10 mei 1945. De Duutsers hadd’n zich oaver e gèèm’n en het èèrste wat ze met mekaa dèud’n, was het Wilhelmus zing’n. Drei vuurwaard’n wadd’n der, neet spöll’n op zundag, gen instrumèènt’n gebruuk’n in dàànskapell’n en de nieje club heet’n vanof toen HMV. Met mekaa bint ze grôôt e wörd’n en zestig joar gelèène bint doar de trommelaars biej e kömm’n. HMV was altied biezunder in ôôns kleine darp. Zie schupp’n het tut Nederlands kampioen in de eredivisie. At er wat bezunders was zag ie de keerls duur Hoolt’n hen trekk’n. De kleine keerls vuurop en de grôôte heurns achteran. Mien gehèug’n is vaste hèèl selectief, mà keerls as Ab Westerik en Bernhard van ’n Tol lôôpt zô wier duur mien beeld. Netuurlijk vuurop Lieuwe Meinsma, strak in de pas zwaaid’n ne den grôôt’n stok duur de lôch, at ze vuurbiej kwamm’n. Opvallend, det schriele keerltje, Ott’nherre, met de pann’ndeksels. Ôôit hadd’n ziene zöns de deksels stillekes met e nömm’n Hoolt’n in. Det gaf geliek buur’ngerucht. Het darp sprök ter schààne van. Nen ààndern HMV-er, volgens miej ôk ne trommelaar en stokk’nzwaaier van het èèrste uur, Berend Willem Dapper, schrèèf ter oaver biej ’n èèrst’n Prins Carnaval in 1969.

’S Avonds laat gung men het darp in, met de deksels van ne trom.
Prins Waterjan den Eersten, lachte zich z’n eigen krom.
Gezien het middernacht was, verstoorde men de rust.
Prins Waterjan den Eersten hef toen de zaak gesust.

De tied schuf veerder en duur mien beeld schuf Haan’n Sas. In één keer ze ‘k em wier houw’n, argens mill’n in het korps. Zie möt ‘m hoaste wal extra ruumte hemm’n egèèm’n. Hij zwaaid’n met die trommelstökke alle kàànt’n uut. Oaver de tromme hen raak’n e feilloos de ààndere kàànte. Zô bint er nog völle meer diet as schaduwn an miej vuurbiej trekt. De halve midd’nstàànd zat wal biej het korps. HMV is nog altied van alle markten thuus. Zie hebt Hoolt’n verscheid’n muzikàànt’n e schunk’n. Loaw we hopp’n daw we ze nog lange in Hoolt’n en umstreek’n meugt heur’n. Hoolt’n zôônder Haa Em Vee. is as jenèèver zonder alcohol. Wis en waarachtig.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.