voor Holten, door Holten

Frisse frats’n

0

Het kan mangs raar lôôp’n. Vuur een tiedje trugge rèè ‘k langs een spandook en doar stun met grôôte letters op “frisse fratsen”. Zôônder noa te dèènk’n rèè ‘k veerder, mà het gekke was, dà ‘k een paar daag’n later, det nog altied in de kop had zitt’n. Ik wusse ágèèt neet meer woe ‘k ’t äns e lèèz’n had, tut mien lèèzende ôôge völ op de Uutmarkt. Ik namme an det het doar wat met te maak’n zôl hemm’n. Èèm’n veerder op lèèz’n ik det er ne jubileumwedstried was vuur Jehan van Harwich. Det kon ’t ôk nog wal is weer. Vuur miej reed’n genog, um is wier te goan kiek’n op’n Meermanskààmp. Het beste elftal wat Hoolt’n ôôit hef e had, voetball’n doar nog één kèèr wier, ter eere van Hantje Veneklaas, ziene 1250 ste wedstried. Zie wadd’n der àmoa. Het tempo van de wedstried lèè wat lèèger as vuur vèèrtig joar trugge, mà de wille was ter neet minder umme. Onvergettelijke voetballers, as Breukink, Bronsvoort, Hommes, de Slager, Engelsman, Rinie, Labobar, Dekker en het Vöske zag ie noar joar’n is wier op het veeld en net as in de goeie ôôlde tied, wunn’n ze. Det wadd’n frisse frats’n, mar achterof blek det het met det bord niks te maak’n had. Noa die wedstried èèm’n noar de Uutmarkt, det môs ’t dan wà weer. Het was ter merakels gezellig. ‘N Smidsbeelt was greun an e klèèd. De lèu genött’n der van, met as ofsluuting, roots of pop, met een lekker biertje of ne buul patates, op de voes. Môôi, van hôôg nivoo en op het terras biej de bakker, wadd’n de luxe brèudjes an ’t èinne van ’n oamd vuur niks. Al met al ne hôôp frisse frats’n, mà nänns, ha ‘k det bord e zeene. Noe bestoat de Fienpreuvers toevallig binn’nkort ôk vèèr’nvèèrtig joar. Ik heb mien lech is op e stökk’n of zie iets wuss’n van het bord “frisse fratsen”. Zie wuss’n nänns van. Het enige wat ze kwiet woll’n was, det er op 11 november, met völle tam tam, ne tentoonstelling wördt e opent en det ze receptie hôôlt, mà veerder niks gen frisse frats’n. Ik blèève met det bord in mien hèufd zitt’n, tut dè ‘k is wier noar Battum môsse. Doar stun het. Noe begrep ik woerumme ô’k ter in Hoolt’n niks oaver kon e vind’n. Kiek op www.frissefratsen.nl , stund er biej. Netuurlijk hè ‘k det toen drek e doane. Zô kwam ik der achter det het wat met de Battumse karmse te maak’n möt hemm’n. In ieder geval köj’ der op karms’nzundag meer oaver heur’n. Allèène à vuur onverwachte frisse fratsen, möj noar de Battumse karmse. Netuurlijk goa ‘k ter zelf ôk hen en neet allèène op zundag. Àj’ gek bint van frisse fratsen, möj’zörg’n daj’ der biej bint. Noe kan ’t nog, oaver honderd joar, gen frisse fratsen meer, het zal miej beniej’n wat er uut den hôôg’n hood kump. Wis en waarachtig.

De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link