voor Holten, door Holten

Fees, fees, Kèunefees

0

De keerls bint ter à wier drôk met en dan bedoel ik, de opbouwers, de keerls van de technische commissie. Zie hebt er à ne wekke fees op zitt’n as ’n ààndern der nog an möt beginn’n. Nôh ja, mangs is ’t fees, of en touw is ’t keihard wark’n. Doar lôôpt er nog wat tuss’n, diet twei’ntwintig joar gelèène de knoll’n ôk al uut het vèur haal’n. De generatie van noe wèèt neet ààns meer, as det er ieder joar Kèunefeest’n bint in Hoolt’n. Mà zô lange is det nog neet. Lange wörd’n der e zeg, det zô’n fees in Hoolt’n neet kôn. Det kôn àllèène mar in Markel, Battum en Loar’n. Det geveul, daw we in Hoolt’n gen fees konn’n hôôld’n, wörd’n vuur twei’ntwintig joar, noa twei’ntwintig joar carnaval, vuurgood uut de wèèreld e hölp’n. Ne jubileumcommissie van de Fienpreuvers begun eind 1989 met het bedèènk’n en opzett’n van een grôôt fees. Het was àmoal primitiever as noe. Op de Kalfstermanswèire wörd’n der een grôôt gat in de grôônd e grèèm’n. Doar boam’nop kwam de toiletwaag’n en doar leup het genuttigde bier dan in. Disse wekke, precies 22 joar e lèène, stunn’n de commissie met kromme tèène. Zôll’n de Hoolter kômm’n? Hoe völle kaartjes bint er verkoch? Zôl het lukk’n, of zôl de kas van de Fienpreuvers vuur altied leuig bliem’n. De penningmèister had er een hard hèufd in. De kas was leuig en behalve van ne hàànd vol sponsors was ter gen veerdere financiële hulpe. Het was een machtig gebuur’n um vuur de èèrste kèèr het kleine pepier’n Kèunefeeslogo te zeen greui’n in de schuure biej Anton van ’n Leermèister. Goold’n keerls, diet nôôit te beroerd wadd’n um te help’n. Bedriem’n diet de vrachwaag’n s beschikbaar stell’n, of de zaal môôi maak’n met plàànt’n en bloom’n. Vereniging’n as de MAC en HMV leut’n oe neet in de keulte stoan. Het terrein wörd’n bewaakt met herdershôônne, zôdat er ’s nachts neet stiekem wat e drunk’n wörd’n. Noa twei joar vergaadern stun alles in de steigers. Op vriejdagoamd de revue van Twèènte plat, met as trekker Gert en Hermien Timmermans. Een dikke zeshonderd man zatt’n der in de tèènte. Det was e lukt en ôk op zoaterdagoamd kwam Hoolt’n. Met 800 man barst’n het èèrste Keunefees lös. Op zundagmiddag wörd’n det nog is wier dunne oaver e doane met frühschoppen. Onmeunig gezellig. Het èèrste fees zat er op. Völle wark, det op moandag wier veerder gung met het ofbrekk’n van de tèènte en het opruum’n van de rommel. Het blif oe biej, mà het allermèuiste was, De Kèunefeest’n wadd’n geboor’n en een joar later wörd’n ’n droad wier op e pakt. De èèrste joar’n blèèf de penningmèister met kromme tèène lôôp’n. Doar wörd’n kiet e spölt. Noe dut hèèl Hoolt’n met en doar mag de organisatie grèuts op weer. Vriejdag begin ik met Holten Extra op het bedrijvenborreluurtje. En dan zoaterdag, meedein’n met de Korhaan’n. Det màj’ neet miss’n, wis en waarachtig neet.

De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.