voor Holten, door Holten

Doar klopp’n der eene op de duure.

0

De vakàànsie was besprökk’n. Het môs ter mà van kômm’n. Op noar de Noordkaap. Wiej wadd’n nog nôôit zô veer die kàànte uut e wes. Moanden haw we der ôôns op verspitst. Hèèl jammer, het kon neet duur goan. Zô mar in één kèèr kwam der harde bericht’n en môsse wiej ôôns op hèèl iets ààns vuurbereid’n. Het zeek’nhuus. Alles is in kèèr onzeker, mar ie möt vedan. Det möt ‘n àànder ôk. De wèèreld drèèjt duur en ik môsse dèènk’n an de woord’n van de ôôle lèu. “Ie könt oe ‘n armood van de hèèle wereld neet op de schoolders nemm’n”. Zô is ‘t wis en waarachtig. Toch realisèèr oe op zukke momèènt’n det zukke berich’n biej iedereene keihard insloat. Ie beseft dan pas, daj’ der wal is te makkelijk oaver hen stapt, det ‘n àànder met vedreet zit. Het breg oe tut het besef daj’ doar hèèl vuurzichtig met umme deent te goan. Neet daj’ der wat an könt verààndern, mà toch. Wiej hebt de knöppe umme drèèjt en noe möw we wier vedan. Det möt ze in ‘n Haag ôk. Het pèèrs-plus kabinet is neet duur e goane. Noe prebèèrt ze ‘t oaver rechts. Doar möt water biej de wien e doane word’n. As dit neet lukt, könt de pertiën duudelijk angèèm’n woerumme en wèèt te wiej as kiezers wat vunne kàànte ow we biej de volgende verkiezing’n uut möt. Loawe hopp’n det ze àmoal eur vestàànd gebruukt en der gauw een nieje regeering is. Ne regeering woet de democratie met e deent is en woet gen goodwillend mèènse bange vuur hooft te weer. Wat de Hoolter politiek angeet veuilt toch wal op, hoe snel of zaak’n verààndert. Preute wiej vuur een paar joar trugge noar oaver het Lôôkerbrook en oaver transportbedriem’n uut Riess’n diet zich doar, vlak an de A 1 môss’n vestig’n, noe wilt ze een Hooltens transportbedrief noar Almelo hemm’n. Het gekke is det disse suggestie noe van de Provincie ofkump. Ie möt ter hôôgere schoole vuur hemm’n e leert, aj ‘t àmoal wilt volg’n. Ie kriegt wà strak het geveul det ter links en rechts wördt e spölt met de rèègeltjes. Wiej blieft het volg’n, de vakàànties bint vuurbiej en wiej goat ter àmoal wier met frisse mood tèèg;n an. Hoolt’n zut ter ààns uut. Heij’al eff’n e zett’n op het nieje terras biej ‘t kutuurhuus? Ik zôl zegg’n “Tastoe”. ‘T is nog môôi weer, drek eff’n doon en ie zölt konkludèèr’n det het nog môôier wördt as ‘n Beelt hèèmoal op e knapt is. Zet de ôôgklepp’n neet op, blieft um oe hen kiek’n. Vuur disse kèèr, vuur al die lèu met eur eeg’n vedreet, hard hôôld’n en nat hôôld’n, wis en waarachtig.

De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link