voor Holten, door Holten

De held van ôônze generatie

Viem’ntwintig april zôl e 69 weer ’n e wörd’n. Ie könt ‘t oe neet vuurstell’n, mà het möt mill’n joar’n zestig weer’n e wes. Precies wèè ‘k ’t neet meer. Met een man of wat zat e wiej biej Waterjan an de stamtoafel. Op het grôôte biljart achter in het café wadd’n een man of wat an het biljart’n. Ééne, een mager keerltje en ’n ààndern iets grötter wadd’n met mekaar an ’t discussseer’n, hoet ze de balle môss’n stôôt’n. Ééne van ôôns zèè, det magere keerltje is Johan Cruyff, det is ne hèèl’n goei’n voetballer biej Ajax.

Wiej bint neet op e sprung’n um ne foto te maak’n of ne hààndtèèkening te vroag’n. Wiej blèèm’n gewoon ôôns kaartje legg’n en drunk’n ôôns biertje. Det magere keerltje, half hangend oaver het biljart, was inderdaad met zien breur biej Waterjan in ’t cafë. Doar was, à ‘k miej good herinnere, ôk ne wat euldern keerl biej, Arend van der Wel. Hij was voetballer e wes biej Sportclub Enschede en zat noe in verzekering’n. Hij was ne goei’n kennis van de Kassier. Van de Wel is ter um bekèènd, de ontdekker van Johan Cruyff te weer.

In de latere joar’n kwamm’n Keizer en Cruyff nog wal is biej Ôôlbekkinks oaver de vloere. Biej al ziene heldendaad’n môs ik vaake trugge dèènk’n an det dèènk’nsweerdige pötje biljart’n. Veer weg in het Amsterdamse greuid’n twei mèikes op, het wadd’n dikke vriendinn’n van jongs of an, Danny en Yvonne. Nee ik kenn’n ze neet, ’n één’n was van den laater’n voetbalmakelaar en ’n ààndern van de plietsie. Juus den ààndern zôl ik in mien lèèm’n tèèg’n kômm’n. Het is een nichte van miej, van de kôôle kàànte. Völle kontakt haw we neet met die Mokummers. Mar op de femiliereunie kwam ik ik met eur in gesprek en vertell’n ze, det ze met de rèègelmoat van de klokke op visite kwam biej de Cruyffs. Het mèuiste wat ze der van vertell’n was det Johan in huus net zô was as op de tillevisie. Det gif mar an dat det Amsterdamse keerltje altied zichzelf is e blèèm’n. Zô zal iedereene ziene herinnering’n hemm’n an ôônz’n nummer vèèrtiene. Miene gedach’n goat trugge noar die rèèg’nwedstried tèèg’n Argentinië met twei magistrale goals van Johan.

Wiej wadd’n hatstekke verrèèngd, mar Argentinie drèug’n wiej of met 4-0. In de halve finale was e wiej der wier biej tèèg’n Brazilië. Een passje van Cruyff op Neeskes, 1-0 en ne machtigen vuurzet van Krol op Cruyff brach ôôns twee nul. De gefrustrèèrde Brazilianen begung’n schandalige oavertreding’n, mà zie kwamm’n der neet meer an te passe. Van de finale wèè we alles, vuural de èèrste minuut’n, zôônder det de Duutsers ne balle hadd’n an e raakt lèèr e via ne pengel in het Duutse netje. Wat haw we geerne wunn’n, jammer, mà wat hef Johan ôôns môôi voetbal loat’n zeen.

Johan Cruyff, de held van ôônze generatie, wis en waarachtig.
De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link