Boer’npannekooke

Ie hebt ze neet vaake op het menue stoan. Toch bint er tied’n ewes dàj’ alle wekke pannekooke op oen bord krèèg’n. De gedacht’n goat trugge, dà ‘k vuur moo, bosschopp’n dèè biej Mina van Kieft’nbeeld. Pannekook’nmel van Koopmans en ne flesse sloa-öllie. De kanne met melk stun à kloar. Een stuk of wat eier in de panne, èèm’n kluts’n, melk der biej en dan anleng’n met het pann’nkook’nmel, tutdet het beslag op de goeie dikte was. Vuur vaa wörd’n der nog wat stukskes spek uut e bakk’n en die konn’n der dan ôk nog biej duur. In het klèine kökkentje gung’n de ringe van de potkachel. Het vèur wörd’n op estokt. De panne zakk’n net neet duur die ringe hen en dan begun het gebak. Sloa-öllie in de panne. Met ne soepel’n drèèi gung der ne sleef met beslag oaver hen. ‘N stuk of wat spekstukskes der biej en dan zörg’n dàj der biej blèèm’n, want vuur dàj’ der arg in hadd’n wadd’n ze völs te zwart. In het deksel van de sjeupanne wörd’n de pannekooke drèèit. Zô lèèr de èèrste pannekooke al rap op ne grôôt’n teelder met sloa-öllie en al. Een half uur later was het bakk’n edoane en drèèm’n de underste pannekook’n volop in de öllie. Merakels lekker met ne fôss’n strôôp der op. Die understen wadd’n ’n ààndern männ’n vuur vaa. Hoe vetter hoe leever, de öllie leup ‘m vaake langs de kinnebakke. Ôk biej opoe wörd’n wiej traktèèrt op pannekooke. Die wadd’n nog grötter en onmeunig lekker met suuker der biej. Vandaage an’n dag köj’ de pannekooke kàànt en kloar kôôp’n biej de winkel, mà zelf ebakk’n, bint ze toch net wat lekkerder. Um det pannekook’n geveul oaver te breng’n noar de kleinwichter bint wie mar is goan kiek’n biej de nieje Pannekook’nbakker op ’n Beelt. Het was drek à vertrouwd, de Nölle zat met de vrouwe vuur an biej de duure. Ik had bienoa de neiging um ’m te vroag’n noar een kisje sigaar’n. Hij gaf ôk nog ne rondleiding langs al die ôôle foto’s van ’n Smidsbeeld. Môôi heur! Of e der noe altied zit, dörf ik neet te zegg’n. Het maakt neet uut, ie komt uuteindelijk vuur de pannekooke. Het was ter gezellig drôk en de wichter hadd’n à rap de weg evund’n noar de spöllegoodkeelder. Uut de honderden sôôrt’n pannekooke kèus ik netuurlijk vuur boer’npannekooke. Doar was wark van emaakt. Neet àllèène spek, mà vanalles zat er op en wà drei kèèr zô grôôt as daw we ze in huus krèèg’n. Nee, gen sloa-öllie, mar op die vettighèid zat e wiej ôk neet te wacht’n. Wiej hebt er van genött’n en de wichter nog meer van den spölkeelder. Een dik uur later gunge wiej op huus an en wuss’n wier wat boer’npannekooke was en in de gange haw we ôk nog met egett’n van ne piraat’n- en prinsess’npannekook’n. De kinder wadd’n uut espölt en môcht’n ôk nog een kedootje uutzeuk’n. Wat wil een kind nog meer?

Laat een antwoord achter

Uw e-mailadres wordt niet gepubliceerd.

Deze website gebruikt cookies om uw ervaring te verbeteren. AccepteerLees meer