voor Holten, door Holten

Bewustelôôs, zôônder oasem

0

Net vuur de karsdaag’n krèège wiej een schoolkrääntje ôônder ôôg’n. Ie kônn’n oe opgèèm’n vuur ne kursus reanimeer’n en AED . Zôônder bedèènk’n hè ‘k miej op e gèèm’n en ôk de vrouwe wol met alle geweeld met. Woerumme? Och, het zal oe mà gebuur’n, daj’ de pech hebt det oen’ buurman of wie dan ôk duur een hartstilstàànd e tröff’n wördt. Ie stoat ter biej te kiek’n en met met oe nog twintig ààndern. Gen mèinse wèèt wat ter an de hàànd is en wat ter gebuur’n möt. Tweihonderd kèèr in de wekke gebuurt het en wiej bint ter in ôôns lèèm’n àmoal wal is dichte biej in de buurte e wes. Neet daj’ in alle gevall’n het slachtoffer könt help’n, mà aj’ wèèt waj’ doo möt, kan het allichte een klein betje help’n en hôôl ie der misschien een better geveul biej oaver, as daj’ niks kônn’n doon. Vuur ôôns reed’n genog um de gàànk noar de kursus te maak’n. Doar lagg’n ze, drei grôôte pôpp’n met alles der op en der an. Noa enige uutleg, môche wiej drek an de slag. Det is toch nog bes een een raar geveul, aj’ tèèg’n ne pôppe zit te roop’n, van wakker word’n is alles good. Netuurlijk is e bewusteloos en is ter gen oasem. Het wördt keihard wark’n. Twèi kèèr lôch in bloaz’n en dan dartig kèèr pôômp’n op de börste, in een tempo van honderd kèèr in ne menuute.. Ik kan oe vertell’n daj’ der met in’ zwèèt komt. Ie möt net zô lange vedan tutdet ze der an komt met det AED- apparaat en verget neet um 112 te bell’n, want det is wà het allebelangriekste, zörgt ter vuur det ter zô gauw mèuglijk hulpe kump. Vanals hèw we leert, van stabiele zijligging tut an het ansluut’n van het AED apperaat.’N männ’ was zô vuurbiej. Ik was e deepe ôônder ‘n indruk. Het lik àmoal veer weg, mà ik môsse bes een kèèr sloek’n, toen de cursusleider met een kinderpupke en een babypupke op de propp’n kwam. Al met al hèw we der gen spiet van e had, daw we goane bint. Wiej bint àmoal e slaagt en zô gunge wiej met ôôns certificaat op huus an. Neet daw we noe alles wèèt en könt, màr in ieder geval meer as zôônder disse kursus. Noe mà hopp’n daw we der nôôit met te maak’n kriegt, mar at het peerd slöt dan köj’ in ieder geval wat doon. Zô ak à zèère, een hartstilstàànd kump zô’n twei tut dreihonderd kèèr in de wekke vuur, vaake met fataal’n oflôôp. Met mekaa köw we det antal noar beneed’n breng’n. Ik kan oe dan ôk anroa, aj’ de kààns kriegt um zunne kursus te volg’n, doon! Hoe meer lèu of ter bint, diet wèèt hoet één en àànder in zien wark geet, hoe grötter de kààns’n bint vuur de slachtoffers. Een gelukkig 2011 en vuur alles blieft gezôônd, wis en waarachtig. De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link