• Leven in Holten
  • Contact
  • Leven in Holten
  • Contact

Argeniss’n

0
GEDEELD
Van de wekke wörd’n ik e belt duur ne man den ‘k in gen joar’n e zeene hebbe. Hij arger’n zich en wol die argenisse met miej deel’n. Duur umstandigheed’n kump e biej tied en wiele in ’n Diessenplas. Mèèstal löp e dan noar binn’n, um met de lèu, diet à joar en dag doar biej ’n ingàànk zit, een preuitje te maak’n. De leste tied zatt’n ze der neet meer en det was ‘m op e völl’n. Biej noavroage blek, det ze doar neet meer meugt zitt’n van de directie. Het zôl neet het juuste visitekaartje weer vuur ’n Diess’nplas. Hoe zô neet het juuste visitekaartje? At de lèu zelf neet het visitekaartje bint, wie of wat is dan wà het uuthangbord van dit tehuus? As het warkelijk zô is, det ôônze ôôld’n dit kleine plezèèr ontnömm’n is, wördt het tied det er zich is een paar lèu achter de oor’n goat kramm’n. ’n Diessenplas is ter um een thuus te weer, woet iedereene zich op zien gemak veult. Det hooj’ neet mèuier te maak’n dan ’t is. Één’n stap veerder en de lèu met ne rollator möt achterumme lôôp’n um noar buut’n te goan, umdet het het ààns gen gezichte is. Bah!!

Argeniss’n. Van de wekke völ miej op det iedereene mà wat an wil doon. In Riess’n op het gemeentehuus vroagt ze zich of woet Den Haag zich met bemeuit. Weigerambtenaar’n det möt könn’n. Het is te gek um lös te lôôp’n. Wiej hebt ôôns àmoa te hôôld’n an de wet, zôônder verschil te maak’n in lèu. Hôôl ie oe doar neet an, of köj’ det neet, dan möj’ der neet an beginn’n. Het is toch te gek, daj’ zelf uut könt maak’n, waj’ könt doon en loat’n. Het is anpass’n of de eere an oen zelf hôôld’n. Bah!!

Argeniss’n. De eere an zich zelf hôôld’n dut ôônze Jehan. Hèèl Hollàànd hef e in de hàànd. Ie könt er gen töuiw an vaste knupp’n. Hèèle oamde is het op de tillevizie. Jehan geet neet vedan met de Road. Hij stapt neet op. Hij löt het an de club oaver. Zie maakt mekaar uut vuur zwartkop. Wie kan met wie duur eene duure. Zie zit met mekaa te emmer’n in de beerputte. De lôch diet er of kump is veer van fris. Het geet um Ajax, mà nog völle meer um geeld, geeld, geeld en nog is geeld. Det ge-emmer in det betaalde voetbal. Het duuzelt oe mangs van al die miljoen’n. Vuural van al die miljoen’n verlees. Vuur miej steet het as ne paol boam’n water, de pertiën diet weigert um nog mar één’n cèènt van ôôns geeld in det betaalde voetbal te stekk’n, hebt miene stemme. Zie rotzooit biej Ajax nog mar een stèutje vedan. Het zal de èèrste tied wà neet ààns word’n. Tèèg’n det ze der uut bint kan Ajax het kampioensschap wal wier op ’n boek schriem’n. Wis en waarachtig.

De Vèèrkàànte Viefkop.

 

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.