• Leven in Holten
  • Contact
  • Leven in Holten
  • Contact

Zie zit miej an de nött’n

0
GEDEELD

Ôônderuutgezakt zit ik noa te geniet’n van de Battumse karmse. Wat een machtig môôi weer hebt ze e had. En het blif mà môôi. Zôl vadertje Tied neet in de gaat’n hemm’n det het à bienoa oktober is? Straks kriew we al den rèèg’n in ééne wekke op de pette en schakele wiej geliek duur noar de winter. Neet an dèènk’n, mà geniet’n van de môôie daag’n, zô lange as ’t kan. Toch köj’ der neet umme hen. De duustere tied kump, hoe dan ôk. De oamde bint à völle körter en ’s nachts is het à knap kôôld. Ie zeet de dààmp oaver de kale weid’ns trekk’n en ôk de mais verdwient wier uut het landschap. De harfs kump ter an.
In Amerika bevecht Hillary en Donald mekaa, wiet er uuteindelijk president geet word’n van det machtige làànd. Het bint mangs net kleine wichter, diet neet wèèt woet ze met gangs bint. Zie maakt mekaar uut vuur rotte vis, terwiel der in Aleppo iedern dag dôôi’n valt. De mèèns’n maakt er met mekaa ééne grôôte rotzooi van. In de leste paar honderd joar hebt ze meer verneeld as in die honderdduuzend joar der vuur. Alles wat duur mèèns’n is ontdekt, is kepot e maakt. Slaav’n in Afrika, Indiaan’n in Amerika en goat zô mà vedan. Wiej hebt de mazzel um hèèl èèm’n te meug’n lèèm’n op dit biezundere bölleke en wat doo we, mekaa het lèèm’n zoer maak’n. Ie hooft ’s männs oen’n boordcomputer mar an te zett’n of de narighèid uut de hèèle wereld stroomt biej oe de huuskamer in.
Het kan neet ààns meer, ie könt de tied neet trugge drèèi’n, mà toch. Hoe môôi zôl Amerika weer met allèène bizons en en Indiaan’n. Hoe môôi zol Afrika weer met àllèène de dôônker gekluurde lèu. Ik wèèt het neet, vermoedelijk vöcht’n ze dan mekaa de tèènte uut en was het neet völle better dan noe. Mèèns’n bint noe één keer moordzuchtiger dan alle ààndere schepsels met mekaa. Ie könt de grèènz’n neet dichte doon en dèènk’n dàj’de narighèid buut’n de duure hôôlt. Al die miljarden mèèns’n diet het slechter hebt as wiej, zöj’ mött’n help’n um ôk iets te hemm’n op dissen aardkloot, ààns zölt ze bliem’n kômm’n in naam van wie dan ôk. De wereld um ôôns hen is roazend. Wiej könt nog geniet’n van de betrekkelijke röste. Aleppo zucht ôônder de bomm’n. Het dut ôôns dèènk’n an Rotterdam, Stalingrad, Dresden en Berlijn. Àmoa narighèid, veroorzaakt duur het mèènsdom. Wat heiw we der van e leert? Niks, te wèinig, mekaa de vleeg’n ofvang’n en zwatmaak’n. Het is een breuinös en àllèène de mèèns’n spölt de hoofdrolle. Doar kump gen ander schepsel an te passe.
Nen eekhoorn zit miej an de nött’n. Het beesje zörgt er vuur det e de winter duur kump. Ik loat ‘m geword’n, want an ne bôôm zô vol beladen, mis ie één, twei nötjes neet.
Wis en waarachtig neet.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.