• Leven in Holten
  • Contact
  • Leven in Holten
  • Contact

Zie schèidt er uut

11
GEDEELD

De tied vlug. Ie zeet oe zelf nog wier noar de Loarnseweg hen fiets’n, een brèèfke in het knuuske, met doarop eschrèèm’n, läämpke 60 watt. Ie gèèft het of. ‘N ôôld’n Oolbekkink kik tuss’n al die läämpkes en haalt er precies ’n goei’n uut. Ie zölt die winkel neet meer antreff’n. Het is joar’n làànk de viswinkel ewes van Reinaardus en ôk det is inmiddels à wier geschiedenis. Het geet zô snel. Ie zeet Albert as kind doar spöll’n, ôônder den grôôt’n eek’n biej dôômie Frans en noe geet e, bienoa 67 joar, met pensioen. Joar’n làànk zag ie zien viskroam op de vaste stèè op ’n Smidsbeelt in Hoolt’n. Netuurlijk èèrst stund’n de oolders, Jan en Mine der nog achter. Hèinig an zag ie de uutbreiding. Ne môôie nieje winkel in 1974. De bèire jongs, Albert en Jan, kwamm’n biej in de zaak, mar ôk naam’n as Kelder, Ria en Bertus wadd’n bekèènde gezicht’n doar op ’n Beelt. Zie trökk’n langs de markt’n in de buurte, van Lochem tut Roalte. Ie zeet ’n ôôl’n Jan nog de nieje haring schôône maak’n, op een plàànkske, boam’n nen emmer. Één kèèr in ‘t joar wörd’n de ôôld’n van daag’n vol e stopt met vis , vlèis en dràànk duur het trio Reinaardus, Piet Brands en Water Jan biej het Bejoar’ncarnaval. Joar’n làànk had de familie ne vaste plaatse op de Zuud Loarnse Peerdemarkt en natuurlijk wörd’n de Battemse karmse an edoane. Duur probleem’n met de gezôôndheid môs Jan Jr. der uut stapp’n. Noe, de leste joar’n bint Albert en Rikie de vaste gastheer en gastvrouw. Met het eulder word’n, wörd’n de aktiviteit’n hèinig an of e bouwd, mar. alle wekke wörd’n der èèm’n bie eproat op ‘n Beelt. Het leste niejs wörd’n uut ewisselt.. Ôônder het bakk’n duur, heult Albert precies in de gaat’n, wat er àmoal vertelt wordt. Ôôndertuss’n breg Rikie de vars gebakk’n vis an de man. Noe stopt ze der met. Op 31 december stoat ze vuur de leste kèèr op ’n Beelt. Ie könt eur op àànderhalm’n meter ne hàànd gèèm’n. Het zal stille word’n, want Albert was altied duudelijk anweezig. Één geluk is ter, doar kump ne niej’n visboer. Noa al die joar’n gen Reinaardus, want opvolgers hebt ze neet. Albert en Rikie bedàànkt, het geet oele good en wiej hopt oe nog lange te zeen an de ààndere kaante van den niejen viskroam

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.