Zie bint wier an ’t vergaadern

0

Ie markt ter neet zô völle van. Riess’n is veer weg. Ie heurt of zeet wèinig. Mà toch ech, zie vergadert dom vedan en bint steil drôk um geeld binn’ te haal’n. Disse wekke valt de gemeentelijke anslaag’n wier in de busse. Doar zölt sommigen van ôôns keihard wakker van word’n. Vuural de boer’n zal de WOZ nog rauw op ’t dak vall’n. Viem’ntwintig precèènt gemiddeld hèuger dan vuurig joar. Zie volgt noe de landelijke taxaties, vroag miej neet woerumme.

Veerder is ter in de commissie e praot oaver de bôch biej Rouw’nhorst. Allerlei adviez’n bint ter binn’e kömm’n, vuur ne môôi’n rôônd’n bôch noar de A één, mà de provincie heul ’t biej ne tweede rotonde doar achter in darp. Wat is good en wat is slech. Woej’ ôk weer möt, in of buut’n Hoolt’n, het verkèèr geet in alle gevall’n duur ’t darp, oaver de Oranjestroate of oaver het Zilverzandtracé.

Ôk het Schèèperspad hef wier op ’n agenda e stoane. Lèu, diet an het pad wont, hebt het wier is een kèèr dichte loat’n greui’n. De gemeente hef ter te wèinig noar umme kekk’n. Ààndern kriegt noe het vootvolk oaver ’t làànd. Doar bint roadsleed’n diet het niks uut maakt woet het pad löp. Doar zakt oe hèèmoal de bokse van of. Kortumme, het Schèèperspad is net Peejten plees, allèène, het duurt völle langer. Wethoolder Lech’nbarg dut doar deftig an met. In de commissievergaadering is ter zeg det e, in februari, de zaak zôl bekiek’n, allèène in de notuul’n is det neet wier te vind’n, dus zal der wà wier ne langere tied oaver hen goan, vuurdaw we det kapittel is een kèèr vuurgood könt sluut’n.

In de road is e vroag’n of stukk’n, diet Hoolt’n angoat, ôk in Hoolt’n ter inzage könt ligg’n. In twèiduuz’ndzèume is of e sprökk’n det det neet geet gebuur’n. Doar bint te wèinig lèu, diet ter gebruuk van maakt en die paar, diet wà kiekt, bint mààns genog um noar Riess’n te goan. Zie goat er biej de gemeente vanuut, det iedereene mar op het compjoeterscharm möt kiek’n um te zeen, woet het àmoal reilt en zeilt in de gemeente.

En dan as leste, mar um de dôôie dôôd, neet het minste, de Kèune, de Pôômpe en het Leuig’nbäänkse op ’n Beelt. Wethoolder Lech’nbarg zal der zô gauw mèuglijk noar kiek’n. Het één en àànder zôl in de weg stoan vuur de mark. Det is de wereld op zien kop zett’n. Het möt toch zô weer, det aj’ ’n Smidsbeelt mèuier wilt maak’n, daj’ dan disse dinge drek wier inpast, of neet. Det hef niks met de mark of wat dan ôk te maak’n. Disse Hoolt’nse element’n wiw we noe trugge hemm’n op ’n Beelt. Het lik miej neet zô moeilijk en aj’ der met in de maage zit, zörgt dan vuur duudelijkhèid vuur àmoal. Zet het in ’t Hoolt’ns Niejs, zôdet iedereene det kan lèèz’n. Wis en waarachtig.

De Vèèkàànte Viefkop.

Misschien ook leuk

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link