voor Holten, door Holten

Wissink of Wonnink

Zô mar in één kèèr zat ik tèèg’noaver eur. Een statige vrouwe, diet zich zörg’n maak’n oaver de wereld van vandaage. Det is ôk neet zô gek at ze der in Amsterdam net ééne letterlijk en figuurlijk een köpke kleiner hebt e maakt. Een geveul van onmach kump biej oe op. Wat möw we der an doon? Wiej wadd’n het met mekaar eens, het geet de verkèèrde kàànte op.Eur man zat met een geröst harte biej de kapper ôônder het mes. Duck preut alle kàànt’n op, zie rèègelt, volgens Joop, alles. Joop was kloar en Duck môg betaal’n. Jammer daj’ neet meer länger könt proat’n, mà zô geet het biej de kapper, ie sprekt of en ie bint an de buurte. Eerder trökk’n de keerls der ne middag vuur uut um zich te loat’n knipp’n. As het hèèl gezellig was leut’n ze de buurte vuurbiej goan. Het is à wier een dikke viem’ntwintig joar e lèène det de Wissinks stopp’n met de kleerwinkel. Ôôit begunn’n in 1859 as Wonnink. Doar wörd’n àllèène mà dochters geboor’n en zô kwam de Wissinks in beeld en det zôl zô duur goan tut 1990. Met mekaa leup’n ze de kapperszaak uut, ietske stiever in de butte as vrogger, mà veerder nog niks verààndert. Ik môsse deepe grèèm’n. Toch kwamm’n de gedacht’n an die winkel en de lèu diet er rôônd leup’n wier biej miej noar boam’n. Gert en Eg Wissink, bèire oprichters van de voetbal in 1921 en erelid. Het wadd’n gezeene lèu in het Hooltense. Hèèl lange kwamm’n ze nog noar de Meermanskààmp um de kleinwichter te zeen voetball’n. Nee ik heb ze nôôit zeen voetball’n, mà zie wadd’n wal allebeire erelid. Miene gedach’n vleegt hen en wier en ik stoa met mien moo vuur de winkelduure. Zie kon der good trechte um det ze biej Wonnink de gröttere moat’n hadd’n. Miej is vuural biej e blèèm’n, det stuupke dèj’ op mônn’n en die aparte winkelbelle. Mar ôk al die vroole diet doar an het nèèistern wadd’n. In die tied wadd’n der ôk nog echte kleermakers an het wark. Het was ter zô’n röstig höfke doar. In latere joar’n zatte wiej biej Hartsuuker in de tuin op die plestiek steule, met nen ijsco of ne buul petat. Het is deepe grèèm’n. Eg Wissink is an ’t tachtigen biej Water Jan. Hij hef net een wörske besteld.. Hij hef goeie kaart’n en noa twei happ’n wors wrif e zich met de vette hàànd duur zien stekkelkuif. De hàànd schôône en zien hoar schittert wier in het lech van de cafélààmp’n. Ja doar zat’n môôie keerls tuss’n. Jehan is miej ôk altied biej e blèèm’n. Altied aparte frats’n, mar ôk môôie dinge. Zô kwam e steevaste iedern vriejdag met ne môôi’n bos bloom’n vuur Janna biej Maats binn’n. Joop en Duck hadd’n gen opvolgers. De jonge generatie is Hoolt’n uut e vleuig’n. De kleerwinkel is neet meer, de Wissinks en gedacht’n doaran nog altied.
Wis en waarachtig.
De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link