voor Holten, door Holten

Willemzen Haarhendriks

0

Nee, ik heb ‘t neet zelf àmoal uut e zoch, mà met een klein betje kombinèèr’n, kriej’een aarig verhaal. Ôoit lèèz’n ik det er lèu uut Hoolt’n met Napoleon met wadd’n e wes noar Ruslàànd. Van de wekke zag ik biej femilie nen ôôle oorkonde hang’n van ééne Jan Willem Haarhendriks, diet in 1831 met had e doane an tiendaagse veldtocht in België. Hij was de zönne van Willem Willemzen Haarhendriks. Det dèu miej dèènk’n an de naam diet op het boerderiejke van Veneman an de Dèimterweg stun of steet, Willemzen Haarhendriks. Één van de noazoat’n van disse femilie had miej al is verteld, det eur femilie, vuurdet ze op de boerderieje, Gold’nbelt in Lôô wonn’n, van Hoolt’n of kwamm’n woet ze an de Dèimterweg hadd’n e wônt en det ze toen Willemzen Haarhendriks heet’n.Het stuk grôônd det ze doar hadd’n möt nen aarige lappe grôônd weer’n e wes, mà zal duur verarving wal meer en meer weer’n versnipperd. In Hoolt’n is de naam Haarhendriks neet zô bekèènd, mà Willems kump nog wà vuur. Det möt hoaste wà veere femilie weer, want doar bint er nog wat diet as biejnaam nog Haring hebt. Het dut miej dèènk’n an Haring Ab Willems. In ziene weire, an de Loarnse weg, stun joar’nlàànk het Poasvèur van de Haarjödd’n. Woerumme of diss’n Willemzen Haarhendriks noar Gold’nbelt trök, hè ‘k neet veerder uut e zoch. Zien zönne Jan Willem was ’n èèrst’n dent zich Haarhendriks neum’n. Diss’n Haarhendriks, hij was boer, timmerman en metselaar, kwam wier van de tiendaagse veldtocht en het möt hem toch wà redelijk vuur de wind weer’n e goane, want ziene zöns hebt àmoal studeert. Ééne trök ter noar Zwolle, hij was plietsie en gemeentebode en ’n ààndern schupp’n het tut hoofd gemeentewark’n in Hengel. Dochter Aaltje van 1851 blèèf op “Goldenbelt” en zie trouw’n met Pakkert. Zie is doar e störm’n in 1941 en lig in Battum begrèèm’n. Noakommeling’n van eur trökk’n later, van Gold’nbelt, via het Battemse Venne wier noar Hoolt’n, Mannie en Mientje Pakkert. Eur zuster Alie is e trouwt e wes met Hendrik Dikkers, de ôôle Bakker. De va van Aaltje Haarhendriks boer’n dus op Gold’nbelt en gung met Koning Willem 1 op oorlogspad noar België en kwam as glorieus winnaar wier noar huus De oorkonde is ne verkloaring en ne bevestiging det e as kanonnier met hef e vöch’n in de tiendaagse veldtocht van 1831. Bie het noapluuz’n van het één en àànder köj dus gerös stell’n det er in Hoolt’n ne hôôp noazoat’n rôônd lôôpt van diss’n ôôldstrieder. Zô kwam ik nog Hoolt’nse femilienaam’n tèèg’n zô as Goldenbelt, woet ne dochter wier trouw’n met eenen Oplaat. Één van de jungste telg’n uut dit ôôle geslach löp ôk wier rôônd onder naam Stroink en neumt miej opa. Nee, zelf hè ‘k gelukkig neet in ’n oorlog e zett’n. Wie knepp’n ‘m à toen we in 1967 ’n weekend binnen mônn’n bliem’n, biej de zesdaagse oorlog van Israel. Wis en waarachtig.
De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.