• Leven in Holten
  • Contact
  • Leven in Holten
  • Contact

Vuur de èèrste kèèr, een kedootje

3
GEDEELD

Doar köj’ oe niks biej vuurstell’n heur ‘k de mèèst’n dèènk’n. Det veuilt te begriep’n. Àj’ noe zeet wat de wichter àmoal kriegt op ne verjeuirdag, dan is det ôk neet biej te been’n. Ne kamer vol volk en het ééne noar het ààndere kedoo wördt in ontvangst enömm’n. Èèm’n wördt er duur de jonge jeuirige noar ekekk’n en dan wördt het, biej de ààndere presentjes, op de baànke esmett’n, um der de èèrste uur’n neet wier noar umme te kiek’n. Oaverdoad neumt ze det. In disse tied det alles zô onmeunig duur wördt, dèènk ie der wal is an, woer bezuuniging weg kan word’n ehaalt. Noe is det achter iedere vuurduure ààns, mà toch, àj’ het vergeliekt met de joar’n vieftig, zestig veuilt er hèèl wat te bespoar’n. Zet ’n auto mar an de kàànte, loat het bad neet vol lôôp’n, mà wast oe in een ofwasteiltje vuur de kachel. Centrale verwarming en aardgas, nôôit van eheurt. Met mekaar um de enige kachel in ’t huus. Ne gebreid’n borstrok an en dan deepe ôônder de stikdekk’n. Nee, det kan noe neet meer, heur ‘k oe zegg’n. Beseft dan wà det er wereldwied nog miljoen’n lèu bint diet het met minder möt doon. Èèm’n trugge komm’n op det èèrste kedoo. Nôôit bin `k ’t vergett’n. Ie lôôpt met zô’n ofgeslett’n heult’n autootje oaver de klinkertjes te slepp’n. Vaa had ‘m zelf in mekaar etimmert en dan op oen’n verjeurdag kump ter nen oom an met een splinterniej, blikk’n autootje. Oh wat môôi, knalrôôd met ne trekveere. De ààndere kedoos bint meer in de stijl van die tied, nieje hààns’n, een paar zwarte underbokses en een mechesters jäske met ne ritse der in. Gen oaverdoad an spöllegood. Zô was die tied. Loaw we hopp’n daw we zo veer neet trugge hooft, alhoewel het wà good is um te beseff’n daw we nog altied in een onmeunig bevuurrecht länneke wont. De tied’n bint neet makkelijk, völle lèu hebt er ôônder te lied’n, mà slech, echt neet heur. Det rôôie autootje, hoe bliej zôll’n de kinder der met wèèr, as het doar biej zôl bliem’n. Net zo bliej en de rest van de kedoos könt vuur altied achter de rodondendrons. Ie schrikt wakker uut oene gedacht’n en drinkt nog mar een biertje op de jeuirige. Netuurlijk sloaj’ de hapjes ôk neet oaver. Doar is genog. Het maakt neet uut, oj’ noe op ne verjeurdag of ne receptie zit. Wiej deelt volop met in de oaverdoad

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.