voor Holten, door Holten

Toer de Holten

0

Wekkenlàànk zit de eene helfte van Hoolt’n te kiek’n noar het wielrenspektakel in Fràànkriek. De ààndere helfte argert er zich an det er niks ààns te bekiek’n veuilt as de tour. Gelukkig vuur eur, het is de leste wekke en dan geet het wielervirus wier vuur een joar de kaste in. De vuurspelling’n bint neet van de lôch en de verslaggèèving vlug alle daage oaver de äpps. In de joar’n vieftig en zestig hadd’n ze in Hoolt’n à ne tour de Holten. De Hoolt’nse Levitans, De Groot en Klein Velderman hadd’n het parcours uut e zat en wiej wadd’n alle daage an het train’n um mar een betje met te könn’n komm’n in det grôôte peleton. Van de training’n wèèt ik nog daw we met een man of wat rondjes rèèd’n oaver ’t Hoolterbrook. Van de Noordpool, biej Nös Jehan rechtsof en oaver de Daperdiek wier op Hoolt’n an en dan vèèr kèèr rôônd. Net vuur de Noordpool drèèj’n der ne grôôte meskoare ’n Darperdiek op. Vèèr man brèèd kwamme wiej ‘m intèèg’n. Hij gung neet an de kàànte en wiej ôk neet. Met het rad wörd’n ik tèèg’n die meskoare an edrukt en kon op huus an lôôp’n. Zôônder spèèk’n in de fietse köj’ neet vedan rie. Vaa was ter neet bliej met, ma Gert van ’n Bos wà. In de vakààntietied was het dan zô veer, een man of dartig begun an het grôôte wielergebuur’n van ééne wekke. Het was nen ongelieke wedstried. Pluumers uut Èènter had à ne racefietse en wiej stunn’n der biej met ôônze gewone jongsfietse, zôônder versnelling. Ôk het verschil in lèeftied was grôôt, het leup van 12 tut 18 joar. Het maak’n neet zô völle uut, de wille was ter neet minder umme. In de etappe van Battum noar Hoolt’n zatte wiej nog in de kopgroep. In ne gemeen’n bôchn noar links, stök ter ne boer oaver en het halve peleton vleuig ter oaver hen. Weg was de goeie klassering. Zwoar was de weg noar Hoolt’n, met an het eine de beklimming van de Pastoriestroate. Wiej rèèd’n wà vaaker achteran. Vanuut Èènter oaver de Borkeld môs e wiej op de wegwiezers kiek’n um de weg noar Hoolt’n trugge te vind’n. Toch biw we één kèèr in de kopgroep Hoolt’n binn’n e rèèdne. Het volk stun rieg’n dikke te kiek’n en met bromfiets’n vuurop kwamme wiej het Rooie Darp op scheur’n en vuur èèm’n veul’n wiej ôôns Wim van Est en Wout Wagmans. De priesuutrieking was biej Amicitia. De twei en twintigste plaatse en een dèuske met bààndofnemmers en sluutie was miene pries. Onvergettelijke tied’n en tèèg’nswoorig met al det drokke verkeer neet meer uutvoerbaar. Doarumme doow we dus alle joar’n met an de tourvuurspelling’n van Hoolt’n en de kràànte. Ie kriegt nog altied wier det geveul uut die tied daj’ zelf met dèud’n. Oh ja en de winnaar van det joar, Jehan Pluumers uut Èènter en tweedes Jehan ter Maat, wis en waarachtig.

De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link