Sallands op gemeentelijke website?

2

Beste leu,
 
Netuurlijk was ik blie met het Sallàànds op’t gemeentehuus. Op de compjoeter zee’k tut mien verwôôndering nog altied allèène mà Twèènts. Det hef noe lange zat e duurt. Ik kriege het geveul dawwe blie wordt et maakt met ne dôôie musse. Doarumme hè’k het Riessens mà zô good as’t gung vertaald in het Hoolt’ns. Allèène de leu die’k in mien’n compjoeter zatt’n kriegt dit berich. Het Hoolt’ns niejsblad, Hoolt’ns Niejs en 350 Freddy wèèt ter ôk van. Ik verbeele mie neet det mien Hoolt’ns het juuste is, mà het likk mie good genog um met te beginn’n.
 
Good goan

De Vèèrkàànte Viefkop

Gemeente Riess’n-Hoolt’n

Good èèm’nwich tuss’n vrieje tied en bedrievigheid.

De Gemeente Riess’n-Hoolt’n zeg. “Kômt der in, dan kö-j der uut kiek’n”

Uutgestrekte natuurgebied’n op één van de meuiste plaats’n van Nederlàànd.

Honderden joar’n geschiedenis, die’t de meuite weert is um te wèèt’n, mà ôk ne gemeente die’t heult van bedrievigheid. Van alle sôôrt’n bedriem’n, die’t de vleugels als mà wieter uutsloat. Wie goat op ne niejderwetse meniere umme met wônn’n

en wi-nkels. Wie doot ter alles an, zôdet al ôônze börgers good in eur vel zit. Doarumme zegge wie ôk. Kômt der in, dan kö-j der uut kiek’n.

De gemeente Riess’n-Hoolt’n is ontstoane op 1 januari 2001, toen’t Riess’n en Hoolt’n bie mekaa bint e kömm’n. Ôônze gemeente lig hèèl môôi op’n ràànd van Twèènte en strekt zich vèèrder uut in Sallàànd, tut vèèr vuurbie ’n Hoolterbarg op de Sallààndse Heuvelrugge. Ôônze 36500 inwonners wônnt, warkt en lèèft ter met völle wille.

Niederwets zaak’n doon.

De leu in Riess’n-Hoolt’n bint gewèènd um de hàànne flink uut de mouw’n te stekk’n. Det köi oaverà an mark’n. Ôôit war’n hier de steenbakkeriej’n en de jutte en textielfebriek’n. Op die fundemèènt’n kôn’n ne hôôp nieje febriek’n wieter bouw’n. Verget de boer’nsector ôk neet. Ondernemming’n diet in eeg’n làànd en in’t buut’nlàànd eur pertieje met bloast. Ie hebt bouwbedriem’n, vlèis en metaalfebriek’n, diet verwarkt en bewarkt, bedriem’n diet verpakkingsmateriaal maakt en reiz’n anbèèdt oaver hèèle wereld. Vèèrder transport- en mederne bedrieve die’t wark doot vuur ààndere ondernemming’n.

Ne môôi’n driefvèèr

Umdet ôônze gemeente an de A1 lig en an de belangrieke spoorliene tuss’n de Randstad en Duutslàànd is det ne exta anjaager vuur de economische ontwikkeling. Doarbie häenk ter een gezôônd ôndernemmersklimaat: gen goold zô good!  Zaak’nleu, diet met wat niejs wilt beginn’n, zut de gemeente gèèrne kômm’n en wilt ze ôk gèèrne help’n. Start’nde ondernemmers könnt trechte in één van de vèèr startershall’n, die könnt vi-nd’n op de vèèr bedriem’nterrein’n in Riess’n en Hoolt’n, woet alles tut in de puntjes e rèègelt is. Het is gen wôônder det ter in ôônze gemeente weinig mèèns’n bie de duure lôôpt.

Plezèèrig wi-nkeln

Doar is hèèl wat te kôôp in ôônze gemeente en doarumme wördt ter ôk zô völle winkeld. De gemoedelijke wonnkern’n, wi-nkels vuur netzelfde wai zeukt, vuur niks perkèèr’n, de actieve winkeliersvereeniging’n: Met det sôôrt dinge kriej vanzelf det de leu van alle kàànt’n komt um bosschôpp’n en inkôôp’n te doon. Ie treft ter de grôôte lààndelijke wi-nkels, mà ôk nen hèèl’n hôôp kleinere, plaatselijke zaak’n. De gezellige markt’n op moandag, vriejdag en zoaterdag maakt’t hèèmoal of. Alle joar is ter ne braderie, verschillende rommelmarkt’n, kôôpoamde, het startfees van de triathlon Hoolt’n en de bekèènde Keunefeess’n. Doar kump ieder joar wier ne hôôp volk op of.

Môôi wonn’n

Ai in ôônze gemeente proat oaver wônn’n, dan drèèit alles um ruumte, ofwisseling en veiligheid. In de verschill’nde niejbouwwiek’n stoat huuze vuur alle sôôrt’n leu. Doarduur bint de wiek’n neet amoal hetzelfde, mà bint der ofwisselende bewonnersgroep’n. Bie niejbouwplann’n gèèfe wie völle andach an greun um de huuze hen.  Det doowe ôk vuur de wonning’n diet in en bie’t centrum stoat. Zô kriej een good èèm’nwich tussen vrieje tied en bedrievigheid. Doarneus slut het greune karakter good an bie de natuurlijke umgèèving.

Plezèèrig lèèm’n

Wôngenot steet nôôit op zichzelf mà het hef all’s te maak’n met oe good veul’n en de meugelijkheid van een angenaam lèèm’n. As’t geet oaver oe good veul’n hef ôônze gemeente ne hôôp te bèè. Ne hèèl’n hôôp sport-cultuur en ààndere vereniging’n zörgt vuur de neurige ontspanning en kontakt’n met ààndere leu. Wat het ôônderwies angeet, is ter een ruum anbod van instelling’n met alle lèèmsbeschouwelijke kluur’n. Um ôônze börgers het lèèm’n zô angenaam meugelijk te maak’n, steet lèèfbaarheid bie ôôns hôôge op’n agenda. Het is van belang det ôônze börgers, màr ôk ôônze gast’n in ne veilige buurte könnt wonn’n wark’n en ontspann’n. Doarumme hèwwe zô völle andach vuur verkèèrsveiligheid, oop’nbaare orde, persoonlijke veiligheid en het handhaav’n van de geeld’nde rèègels.

In alle röste bekiek’n en bewôôndern.

De gemeente Riess’n Hoolt’n hef ne hôop dinge, diet de meuite van’t bekiek’n weert bint. Één van de bekendsten is toch wà de ôôlde Scheeldkarke uut het joar 755. Dan hèwwe nog de Pelmölle, ne stellingmölle , den’t tut 1925 in gebruuk is e wes as öllieslagerieje. An de Ôôskàànte van Riessen kö-j het historische Parkgebouw van Riess’n vind’n, met drek ter neuis de havezate ’n Oosterhof, woer’t Riessens Museum in zit. In 2003 is doar het èèrste en enigste internationale Brandweermuseum lös e goane. In Hoolt’n is de mölle De Hèègeman één van de bezeenzweerdige dinge. Doarneuis hei nog het OAD-museum, de Oudheidkamer in het ôôle gemeentehuus en’t museum Natuurdiorama op’n Hoolterbarg. Netuurlijk mag een bezeuk an’n Canadeez’n Karkhof op’n Hoolterbarg neet ontbrekk’n. 

Lekker tut oe zelf kômm’n.

Wiet  van natuur heult, kan in de Gemeente Riess’n-Hoolt’n zien harte ophaal’n. Ie hebt de schilderachtige netuurgebied’n as’t Hollàànds Schwarzwald, ’n Riessensen Barg, ’t Riessenseveeld en de Ravijntjes. In Hoolt’n kö-j köi nog röstig dwaal’n oaver de Borkeld, ’n Zoerbarg en de wiedsheid van Sallàànd in’n Diekerhook en Splôô. Mà n’ech’n parel in de krone is’n Hoolterbarg, an’t begin van het Nationale Park de Sallààndse Heuvelrugge. ‘n Hoolterbarg is een uutgestrekt gebied, woet heide, buskes, zààndverstoeving’n en noaldbeume mekaa ofwisselt in een kluur’nspel woei’n n’oasem bie inhôôlt. Ie zöllt begriep’n det de dag- en vebliefsrecreatie ne vuurnaame plaatse hebt binn’n ôônze gemeente. Campings, hotels, vakààntiehuuskes: ie valt ter oaver, zôônder dai der oe an stôôt. Bedrievigheid en gastvrieheid, meugt dan ech bie ôônze gemeente heur’n; de röste van ôônze natuur wille wie neet miss’n.

Gemeente Riess’n-Hoolt’n

Bezeukadres

‘nScheeld 1 Riess’n / ’n Smidsbeelt 6 Hoolt’n.

Posadres
Posbusse 244 7460 AE Riess’n
t (0548) 854854
f (0548) 854855
e [email protected]
w www.rijssen-holten.nl
Riess’n-Hoolt’n. Doar kö-j op rekk’n.  

Misschien ook leuk

  • Mans

    Het steet ter op. Ter Keurs en bedankt hè.

    De Vèèrkàànte Viefkop

  • Mans

    Het steet ter op. Ter Keurs en bedankt hè.

    De Vèèrkàànte Viefkop

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link