• Leven in Holten
  • Contact
  • Leven in Holten
  • Contact

Ne verzwikten èènkel.

1
GEDEELD

Biej het opsloan van de kràànte, köj’der neet an vuurbiej. Zô gangswieze is het hèèle làànd ter met vergèèm’n. Overà woej’ kiekt kluurt de wereld oranje. Iedereene is ter met gangs. De verkiezing hew we achter ôôns e loat’n. Die ellende is ôôns het eene oor in en het ààndere wier uut e goane. Volgens Rutte is de PvdA ne rààmp vuur ’t làànd. Wilders hef zien beklach e doane, det ter lèu bint diet ‘m noar ’t lèèm’n stoat en hij doarumme rôônd möt lôôp’n met een veiligheidsves. De SP is begunn’ met de grôôte schoonmaak. Balkenende kan met vakàànsie. Het beloam’n lig achter ôôns en noe mar ofwach’n wat al die môôie preuitjes ôôns oplèèvert. Het geproat is vuurbiej en as ’t an Rutte lig hew we eerder een niej kabinet as ne werelkampioen voetbal. Aw we één van de beid’n hebt bin ik tevrèène. Jammer daw we det neet vuur ’t kiez’n hebt. Wiej zölt of mött’n wach’n, want doar wördt wat of e rotzooit in ôôns wereldje. Joran raakt noe, zô ’t lik, vuurgood van de wal in de slôôt. Viem’nvieftig liek’n bint ter e vunn’ in Mexico. Zô mà lèu diet of e maakt bint, e dumpt in één of àànder gat in de grôônd en det àmoal um drugs en ààndere rotzooi. In Afghanistan snèuvelt ze biej buskes. De Jödd’n maakt de Palestijn’ of en umgekèèrd. Het öllielek in de Golf van Mexico,zit noe dichte. Woe völle of doar verneeld is en kapot e goane, is neet te beschriem’n. In ôôns eeg’n làànd wördt de plietsie of e tuugt en het lik ter op daw we det àmoal mà dôôdgewoon vindt. Ôk in ôôns eeg’n làànd wördt ter e moordt op de hotelkamer en zô köj’ nog wal een tiedje vedan goan um de ellende van de wereld op een riegje te zett’n. Het glid langs ôôns hen, want het allerbelangriekste niejs kump uut de behààndelkamer van Dick van Toorn. Wereldniejs, Arjan Robben hef zien’ èènkel verzwikt. Kan ne noe wal of neet met doon? Wat vukke spierweefsels bint ter kapot? Spölt te met tèèg’n Denemark’n? Wördt Hollàànd noe wà of gen wereldkampioen? Zèum’ntien miljoen Nederlàànders hangt de kômm’nde daag’n an de tilleviezie um mà niks te miss’n van det werelddrama. Wat biej een normaal mèènse ne moand duurt geet biej Robben in eene wekke. Alles wördt ter vuur an de kàànte zet. De krisus is vergett’n. Het maakt niks uut wat’ kost. Robben möt spöll’n of begint te toch op de reservebàànke? Loaw we hopp’n daw we zô gauw mèuglijk een goaltje maakt tèèg’n de Deen’, dan kan den blood môôi op de bàànke bliem’n zitt’n. Verôôndersteld oe dette zich wier blessèèrt. Ie könt ter neet umme hen, het is ne voetballer, woej’ vuur noar de stadions goat, mà wereldkampioen woj’ met alle spöllers. Det mag neet allèène ofhang’n van één’ verzwikten èènkel. Wis en waarachtig neet.

De Vèèrkàànte Viefkop.
 

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.