Ne drèèikolk met onmeunige hette

0

Ie hebt het geveul dàj’ der neet meer uut komt. Het geet mà vedan. De triathlon, het wereldkampioenschap voetbal, de Belg’n bint duur, Max Verstappen, Wimbledon en dan stoat de Toer de France en de Nijmeegse Vierdaagse nog vuur de duure. Àj’ der an dèènkt kriej’ à bloar’n an de veute. Gèèft miej mà de Ronde van Fràànkriek. Tèèngswoorig köj’ het op de tillevisie van start tut finish zeen. À van jongs of an volgd’n wiej det fietsgebuur’n op de radio en in de kràànte. Wiej kent er neet Jan Cottaar. Hij leut Wagtmans oaver de finish kômm’n, terwijl det e den dag was uut evall’n. Theo Koomen stun argens tuss’n de lavendelveeld’n en maakt’n de verslaag’n zô spannend, dàj’ de radio wal hoaste in woll’n kroep’n. Alles wat er oaver eschrèèm’n wörd’n, spoar’n wiej op. Det völ op zich nog wà met, wiej hadd’n allèène mà het Dagblad van Oosten. Alles wörd’n uut eknipt en met speeld’n vaste maakt an het behang in de sloapkamer. An het eine van de Tour zat de sloapkamer compleet in het kràànt’npepier. Wiej woll’n Gerrit Voorting weer of Wim van Est, of nog leever Charly Gaulle of Bahamontes. Wiej wadd’n zô bezeet’n, daw we in training gung’n vuur de Tour de Holten. Ja, ech woar, nen echte etappekoers van ne wekke rôônd umme Hoolt’n. Wie rèèd’n as jonge keerltjes met in die ronde. Gewoon op ôônze eeg’n fietse. Mèèstal op ne minute of tiene achterstàànd, mà wiej rèèd’n ‘m uut. Mangs môs e wiej op de wegwiezers kiek’n um de weg noar Hoolt’n trugge te vind’n. Onvergettelijke tied’n en het wielervirus is nôôit wier vôt egoane. Vanof de joar’n zèumtig köj’ in Hoolt’n met doon an het vuurspell’n van de Tour. Dus disse wekke biw we der drôk met gangs um de juuste vuurspelling’n te maak’n. Möj’ ôk is prebèèr’n. Ie zölt zeen det de ronde der nog spannender van wördt. En dan die hette het geet mà vedan. Zô lange en met zunne strakke wind. Hoe lange màj’ nog sproei’n, de zommer is nog mà net begunn’n. Loaw we der ôôns het hèufd neet te völle oaver brekk’n. Geniet van disse môôie daag’n. Ontspant oe, vult de formulier’n van de tour in en kiekt noar de môôie beeld’n uut Fràànkriek. De held’n van disse tied, Froome, Nibali en netuurlijk ôônz’n Tom Dumoulin. Wie zal der winn’n? Duur al det geweeld binj’ de helden van de Hoolt’nse triathlon, Mark Muller, Marco Muller, Susan Boode en al die ààndern à wier te snel vergett’n. Zô geet het in diss’n roazenden drèèikolk. Völle wille met alles wat er nog te gebuur’n steet diss’n zommer en miene road, hèufd koel en veute warm.

Laat een antwoord achter

Uw e-mailadres wordt niet gepubliceerd.