Ie zôll’n ’t ter van an ’t harte krieg’n.

0

Mangs bin ‘k bliej dè ‘k zelf het voetball’n vanof ofstàànd bekieke. Mà hèèl stiekem wiej’ toch wà wèèt’n woet ze ’t hebt e doane. Nôh, neet al te bes. In de competitie hebt ze ’t lilluk of loat’n wèèt’n. Völs te wisselvallig en te gemakkelijk wörd’n de punt’n weg e gèèm’n. Noe möt ze in drei wedstried’n bewiez’n det ze toch in de vèèrde klasse thuus heurt. De èèrste wedstried leup het kàànt verkèèrd. Met twei nul an de nött’n tèèg’n ne viefde klasser. Gelukkig dèud’n ze ’t tèèg’n de Witkampers een stuk better. Zie kwamm’n met nen oaverwinning trugge uut Loar’n. En ôônze mazzelpikk’n wörd’n e hölp’n duur Lôô. Die stuur’n Echteld noar huus met ne dikke nederlaag. De Rôôd Zwart’n hebt’ wier in eeg’n hàànd. ‘N tweed’n Pinksterdag möt’ gebuur’n in Zutphen. Det möt de Hoolter toch könn’n winn’n. Het zôl môôi weer. Volgend seizoen eindelijk wier de derby Hoolt’n-Battum. Ne mèuiere wedstried köj’ oe neet vuurstell’n. Vuur det’ zô veer is möt ter nog hèèl wat water duur de Schipbekke. Van Bommel möt met van Gaal de Europacup nog winn’n en met zien schôônva de wereldbeker. Vuur dew we det àmoal wier achter de rugge hebt, heij’ zô’n betje vèèrkàànte ôôg’n van het kiek’n noar de tèlevisie of, nog arger, echtscheiding. Mar èèrs moandag met ’t èèrste met noar Zutphen. Hoolt’n in de vèèrde klasse is belangrieker dan al die ààndere bekers. Dus àmoal de vuvuzela ôônder ’n arm en bloaz’n. Det wördt noa de tied, wier een môôi feesje in de kantine. Het nieje seizoen goa we der dan wier keihard tèèg’n an. Ne niej’n trainer, frisse wind. Gen geëikel, van ik kan neet of ik bin misselijk, der an met de lippe. Wiet zich neet an de ofgesprökk’n rèègels heult, ne trap in de kôônte en de kààns gèèm’n an die jongs diet wà geerne wilt. Met mekaa, duur mekaa en vuur mekaa en vuur al die supporters en vriejwilligers, diet alle wekke mà wier kloar stoat um het vlaggeschip van de Rôôdzwart’n driem’nde te hôôl’n. Nee jongs, gen gemekker, gewoon doon. Èèrs zundag en ie zörgt ter vuur daj’.fit bint. Det biertje loaj’ dit kèèr stoa en ie zörgt ter vuur daj’ um twaalf uur in de kajuit ligt. Alles vuur det eene grôôte doel, in de vèèrde klasse bliem’n. As det lukt, heij’ de èèrste hindernisse ‘nömm’n en màj’ verdeend op vakààntie. Het nieje seizoen, doar kan een ieder vuur zich dan good oaver noadèènk’n. Aj’dèènkt daj’oe neet an ofgesprökk’n rèègels könt hôôl’n, möj’zô eerlijke weer en oene plaatse gèèm’n an die jongs diet ter wal een hèèl seizoen làànk vuur wilt goan. Iele wordt duur de club in de watt’n e leg, dus der an met de lippe en èèrs moandag winn’n. Wis en waarachtig.

De Vèèrkàànte Viefkop.
 

Misschien ook leuk

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link