De beume fluustert in vuurjoarswind
Dat ’t mooie zommer temet begint
De veugels heure wie aait moar zingen
Zee kont hun zanglust neet bedwingen
’t Is machtig mooi ut lenteleed
Dat klinkt in weide, holt en heed
Refrein:
Veur zudenwind en heldre luchten
Gung hier veur good ut winter vluchten!
De bla, die zingt in de vuurjoarswind
Dat ’t völle leven nou gauw begint
Geet ’s oavens buten de stilte dalen
Dan heur ie ’t leed van nachtegalen
En liesters bint ok an de gank
Ut dut oons good, dat bliej gezank
Refrein
De tekke ritselt in vuurjoarswind
Dat overal wier de greuj begint
De zaanteveren kriegt nie-e kluren
De zwaluw vlug om huuz’ en schuren
Ok klinkt in ’t roond dun vinkenslag
En doeven koert dun gaansen dag
Refrein
Tekst: H.J.A. Koldewij
Wijze: B.H. Brouwer
