Eene grôôte bende

0

Vuur vandaage bin ‘k ter hèèmoa kloar met. Het loonstrookje hè ‘k is good bekekk’n. Joawà heur, meer as honderd euro der op achteruut. Ie goat er hoaste van oaver ’n nekk’n. Höröt, het möt mà, dan mà wat körter op vàkààntie. As ’t doar dan nog mà biej blif. Mà nee heur, èèm’n later möt de ôôle katte ôk nog kôts’n. Ie zôll’n hoaste dèènk’n det e de kràànte hef e lèèz’n. Ja lèu, aj’ doar in kiekt goaj’ acuut oaver de nekke. De gewone man is volop gangs um de rotzooi van de grôôte graaiers te betaal’n en dan lèès ie det er nog altied lèu bint, diet er met miljoen’n tuss’nuut bint e egoane, zôônder det er ôk mar ééne wat an kan doon. ‘N één’n noar ’n ààndern expert kump langs biej de tillevizie um te vertell’n wat er àmoal uut is e spookt. Het wach’n is op meneer Welling. Hoe lult e der zich disse kèèr wier uut. Gen mèènse kan der wat an doon, mà de Nederlààndse Bàànke hef ’t loat’n gebuur’n. Het is het ôôle verhaal. Zie spölt met het geeld van de gewone man en doar wordt ze good better van. Zie drèèit neet op vuur de financiële ellende. Het veuilt neet te begriep’n. De voetballerieje, woet miljoen’n in umme goat, zô zeek as ne katte. Dreiduuzend Europeese ambtenaar’n diet völle meer verdeent dan Rutte. Meer dan vèèrhonderd valse uutkèèring’n, àllèène in Dèimter. Het lik wà ne besmettelijke zeekte. Wielrenners, diet joar’n vuur de Rabo riedt, stief van de Epo en dan net doon of ze van niks wèèt. Ik bin ’t gelèuve kwiet. Het is schandalig. In de tweede kamer könt ze der niks an doon en ’n één’n pröt nog môôier as ’n ààndern. Noe, in één kèèr bint de euldern, diet eur hèèle lèèm’n zuunig bint e wes en good hebt op e past de lul. Loa ‘k ter oaver ophôôl’n, ààns geet miej de katte wier oaver de nekke. Heij’ det e lèèz’n van die landbouwsubsidies, 750 miljard. Doar wördt vanalles met e doane, zie könt de pötjes neet leuig krieg’n. Ach’ndartig miljoen, àllèène à noar’n bedrief det hààndelt in zuuker. Wie slöp ter àmoal in dit làànd! Kark’n bouw’n, polsstokhôôgspringwedstried’n en van alle onzin wördt er met uut e vrett’n. Zie gôôit met geeld. De ôôld’n raakt van het geeld of, mà neet van de scheuld. In Hoolt’n steet noe ôk wier iets op stapel. Ne tunnel ôônder ’t spoor duur noar ’n Hoolterbarg en dan mà meteen ne grôôte brugge der biej. Hoe gek möj’ weer. Den weg, woet Hoolt’n zô vuur was? Àmoa völs te duur en noe dit wier. Dit is te völle vuur de katte. Het wördt hôôge tied daw we met bèire beene op de grôônd goat stoan en die grôôtse lôchbell’n neet meer opbloast. Vuur daj’ der arg in hebt knapt ze uut mekaa en wast iedereene de hàànne wier in onscheuld. Wis en waarachtig.

De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.

Deze website gebruikt cookies om uw ervaring te verbeteren. AccepteerLees meer