• Leven in Holten
  • Contact
  • Leven in Holten
  • Contact

De vlagge kan wier àànsumme

5
GEDEELD

‘N hèèl’n dag was ’t à spannend. Hoe zôll’n ze ’t goan doon? De leste daag’n zag ie hoe ’t de regèèr’nde pertiën zich meer in meer in buchte krôônkeln, um zichzelf noar winst te proat’n. Biej Derks’n en de keerls wörd’n duudelijk det het zô neet vedan kon. Hoe zôl det in ôônze gemeente word’n. À vrog zoche wiej ôônzen weg noar het stemlokaal. De plich was edoane. Plich ja, ôônze opoe had nog met emaakt det àllèène de keerls môcht’n stemm’n. Altied, biej verkiezing’n, schöt oe det duur ’t hèufd. Jonge, wàj’ stemt möj’ zelf weèt’n, àj’ ma goat. Nog nôôit hew we oaver esloane. De èèrste vuurspelling vuur Noord Hollàànd zagge wiej nog thuus. Det zag ter good uut. Doarnoa drek noar ôônze buurgemeente Battem, um de veriezingsoamd van de BBB, doar te belèèm’n. In lange rieg’n stunn’n de lèu röstig te wacht’n, tutdet ze noar binn’n kônn’n. Wat zôl ’t word’n? De VVD dèur ’t toch ôk neet slech. Ontzetting in de zaal en doarnoa nen uutbarsting van wille en ongelèuf. Een en dartig precèènt van de stemm’n. De oamd kon neet meer kapot. De verslaggèèvers wrung’n zich in alle buchte, um mà de juuste foto’s en filmpjes te maak’n Op de tillevisiescharm’n verbaasde gezicht’n. Nog nôôit was het CDA zô ongenadig of e straft vuur deelname an de regering. Het wörd’n àllèène mar arger, toen blek det, biej de peiling vuur de èèrste kamer, ze ôk meteen ’n grötst’n wadd’n. Geschiedenis is ter eschreèm’n. Goat er mar an stoan. In ôônze eeg’n gemeente vuur het èèrste de SGP, neet meer ’n grötst’n. Netuurlijk zie handhaafd’n zich good, mar ôk in Hoolt’n Riess’n gung de BBB met de eere striek’n. De ààndere pertiën dökk’n in ’t rôôd en möt zich mar is good achter de oor’n kramm’n. Zelfs in Dèimter, Moskou an de Iessel, wun de BBB met oavermacht. Wat de gevolg’n bint möw we àmoa mar is ofwacht’n. De stemme van de zwiegende meerderhèid hef zich duudelijk loat’n heur’n. Noe brek vuur de winnaar de moeilijkste tied an. Hoe goat ze dit àmoa vertaal’n noar Den Haag en Brussel. Houwt ze met de voes op toafel. Kump ter geeld vuur Groning’n en touwslagoolders. Wördt er geeld opniejs verdeeld? Nederlàànd is wakker ewörd’n. De vlagg’n könt wier àànsumme. Het gezôônne boer’n verstàànd is veer duur edrung’n tut in de uutheuke van Den Haag. De BBB van Caroline hef geschiedenis eschrèèm’n. Wiej zölt ze bliem’n volg’n en det doot de ààndere pertiën vanof noe, dubbel en dwars. Het blèèf in Battum nog lange gezellig. Sweet Caroline.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.