• Leven in Holten
  • Contact
  • Leven in Holten
  • Contact

De Pette

14
GEDEELD

Met de Keunefeest’n zeej’ van allerlei volk duur Hoolt’n hen schoem’n. Ja schoem’n, want zo hard gung’n ze neet meer. Met zien achtentachtig joar schuf e hèinig oaver het Zwarte Pad, langs de Kalfstermanswèire. Aw we mekaa zeet begint ziene pretèugjes te schittern. “Heij’alles ôônder controle. Wat hebt ze ’t môôi op e bouwt hè, nog wier mèuier en grötter as vuurig joar.” Hij wis op de Kèunefeestèènte. À ‘k ‘m duudelijk maake dà ‘k tèèngswoorig net as hij gewoon niejsgierig bin hoe of de jong’n het doot, begint e te vertell’n. Hij is een tiedje behoorlijk zeek ewes, mar is ter noe hèèmoa wier duur en de wedstried’n van ziene Rôôd Zwart’n goat ‘m neet mis. Hij is en ik gelèuf’m drek, de trouwste supporter van Hoolt’n. “À’k gezôond blieve goaw we zoaterdag nog èèm’n noar het meedeinfestijn.” Ziene vrouwe steet er gedeuldig biej te kiek’n. Zie is det drôkke van eur man wà gewèènd. Noa een minute of vieve schoeft ze met mekaa veerder in de richting van ’n Beeld. Àk’ze noa kieke realiseerj’ oe hoe rap of de tied vervlug. Het möt in 1959 weer ’n e wes dà ‘k ‘m alle moand’n bezoche um de nieje voetbalplaate op te haal’n. Iedere moand ne geuld’n en zô spoar’n ie de hèèle eredivisie biej mekaa. Mangs stuur’n e oe noar huus, want dan was e völs te drôk. Det kon ôk neet ààns, want alle Hoolter jongs spoar’n met, dus hij môs ter tied vuur uuttrekk’n. In latere joar’n krèè’k ziene rekkening ôônder ôôg’n. Zie klopp’n altied, allèène ie konn’n der vaake gen bal van lèèz’n. Ne plezèèrigen keerl en at e zô of en touw de kroeg in kwam, was het gebuurt met de röste. Met de verwerping’n biej WaterJan kwam e vaake met zien moat, Garradje. Zie dèud’n op alle front’n met. Vuur det ’n oamd dan hèèmoa vuurbiej was gung’n ze bèire, vrolijk en wel, met tass’n vol oss’nstätte en klandestien vlèis op huus an. Het halve vark’n wörd’n ’s oamds laate, noadet e ’n hèèl’n oamd in ’t café had stoan rèuk’n, op de schoolder met noar huus e nömm’n, duur de gelukkige winnaar. Det kon toen nog àmoa. Môôie tied’n um op trugge te kiek’n. “Àj’ zô ôôld bint, bint er neet zô völle èèm’n ôôlders meer.” Hij hef geliek, van ziene generatie bint er ne hôôp neet meer ôônder ôôns. Ôk de Darpstoate is in al die joar’n veràànderd. De schoole, de EHAG, Teunis Koopman, Smitje, Rinus, Water Jan en Roelofs. Àlleène lèu met grieze heuire wèèt nog woe ‘k ’t oaver hebbe. Noe steet er à wier joaren de Abraham Berghof. Ôk môôi natuurlijk, ma hèèl ààns. De nieje tied. Zoaterdagmiddag wadd’n ze met eur bèid’n in de feestèènte en genött’n van alles wat er op het toneel gebuur’n. Het blif ne verstàànnige road, bliem’n geniet’n.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.