De knoll’n op

0

Opa zèè ’t met de rèègelmoat van de klokke en èèm’n later leup e wiej achter ’m an. Met de kruuwaag’n, ’n kààmp op noar ‘t knoll’nlàànd. Knoll’n, hèèle generaties zölt neet meer wèèt’n wat er bedoeld wördt. Ààndern zölt er op stôb en stèè kôôle hàànne van krieg’n. Biej ’t knoll’nlàànd pakt opa zien kniepmes. Hij trek ne grôôte môôie knolle uut de grôônd, strik ‘m ne kèèr langs het buis en schelt ‘m netjes of. Het ôônderste gedeelte van het lôôf löt e zitt’n. Det is het hààndvat vuur ôônz’n knollollie. Ôônderwiel det hij de knoll’n trekt, geniete e wiej van die lekker zeut smakende knolle. In latere joar’n wörd’n het ààns en môs e wiej zelf de knoll’n trekk’n. Oeh, wat krèèj doar toch kôôle hàànne van. Ie zeet ’t zô wier vuur oe, grôôte keerls diet zich de hàànne, um de hoed hen, warm hauwt.
De ofgelôôp’n wekk’n hà ‘k het geveul dà ‘k de knoll’n op had. Of het de hette was of ’n ôôld’n dag, zöw we mar in ’t midd’n loat’n. De wichter hôôlt ’t op het leste. Het was toch ôk wal onmeunig warm.. Ie zagg’n praktisch gen mèènse meer in Darp. Àllèène biej Heusinkveld was het ne drôkte van belang. Hij heult uutverkôôp en det is onmeunig jammer. Gelukkig, hij hef de knoll’n neet op, mà de winkel brach ‘m neet meer, woet het uuteindelijk umme geet. Wiej zölt ‘m goan miss’n. Wier nen ôôle zaak diet het neet bol kan wark’n tèèg’n Bol.com. Eeuwig zunne. Het is meer dan àllèène de winkel diet dichte geet . Doar starft, met het dichte doon van die duur’n, wier een stukske Hoolt’n of. Ongemarkt möj’ der een treuintje um e loat’n. Ôôit leup ik biej ’n ôôld’n Heusinkveld langs de winkelroete. In ziene etalage, een jungske met een treuintje in de ôôg’n. Mien deerntje vund het zô môôi. Netuurlijk hè ‘k ’t vuur eur e koch en noe vieftig joar later häenk het nog altied biej ôôns in huus.
Wat zal Maarten van der Weijden het kôôld hemm’n e had. Noa honderddreienzestig kilometer in het neet al te schôône water van de Freeze elf steed’n had e de knoll’n op. Àj’ zeet woet oene hàànne en veute der dan uut zeet! Det kan neet gezôônd wèèr en det àmoa vuur de kankerbestrijding. Die smerige rot zeekte diet weg kan goan, mar ôk zô mà wier genadeloos touw kan sloan. Mèèns’n diet de knoll’n zô good as op hebt, ma toch vedan blieft vecht’n. Wiej kent ze àmoal in de neuiste femilie. Vuurbeeld’n van armood en vedreet. Wiej loat àmoa wal een treuintje, mar àj’ Maarten van de Weijden det eindelooze gevecht met het water an zeet goan, zeej’ nog mar half hoe zwoar of ’t is. Hij hef ’t neet hèèmoal e haalt. Hij had de knoll’n op, mà zien grôôte doel hef e bereikt. Andach vuur die akelige zeekte, diet neet mag oaverwinn’n. Kàànker.

Laat een antwoord achter

Uw e-mailadres wordt niet gepubliceerd.