Opgelucht oaver de dalende corona ciefers en het môôie weer, de fietse mar is epakt, um te kiek’n hoe môôi of Hoolt’n is. Veer oaver het Hoolterbrook lig den Hoolterbarg in de zunne. De voot van den Hoolterbarg is vandaage de bestemming. Gelukkig ne bubbel zôônder käpke. Brèèf in de busse. Nieuwsgierig? As lid van een uutverkoor’n groepje mag ie ne stemme uutbreng’n op de Keunedarper van het joar 2020. Det is één van de dinge diet duur könt goan. Onvuurstelbaar, van de wekke, de elfde van de elfde. Gen oaverplaatsing van de hofbar, gen Brààndheultjes op ’n Beeld. Wiej zölt gedeuld mönn’n hemm’n, mà hèèmoa stille blif het neet biej de Fienpreuvers. Achter de scharm’n wördt er keihard ewarkt um toch nog wat te könn’n doon in disse tied van bubbels. Wie zölt mönn’n wacht’n op bettere tied’n. Lekker röstig zölt ààndern zegg’n, mar ôk ààndere aktiviteit’n ligt op eur gat. Oaveral is het röstig behalve biej het zeek’nhuus. Doar is iedereene hatstekke drôk. Doar kriej’ in de gaat’n hoe besmettelijk of de corona is. Hoe belangriek of het is, oe an de rèègels te hôôld’n. Biej de ingàànk van de zeek’nhuusbubbel steet ne man, diet oe vrèindelijk vrög um de hàànne te wass’n. De môôndkappe heij’ al op. Binn’n ôk àmoa käpkes. Met ne beslaag’n bril vervolg ie oen’n weg. Ie bint bliej, àj’ noar een half uur wier buut’n stoat. De kappe kan of, eindelijk frisse lôch. Op het journaal komt de verhaal’n van een vèurwarkloos Niejjoar. Gen siervèurwark, gen carbid, àllèène mà bubbeltjes, het is neet ààns. Hef Trump noe verleuirne of ewunn’n, het blif een schimmig schaakspel. Biden hef ôôndertuss’n al een team van specialist’n an estelt um de talloze besmetting’n trugge te breng’n. Det veult good. Hoe gek is het dan, det ze mekaa in het vaarwater zit. President Trump in de bubbel van het Witte Huus en de golfbaane en de Amerikaan’n in die van de warkelijkhèid. Of lig het toch wat ààns, 70 miljoen mèèns’n diet vuur de president hebt estemt. Ie brekt er oe de harssens oaver mà komt er neet ech uut. Zet ie de tillevisie an, heurj de president van Brazilië zien volk uutmaak’n vuur mietjes. Het geet oe duur marg en been en ie vroagt oe of in wat vun ne bubbel of die man zit. Dan trugge noar eeg’n làànd. Doar glid de minister van ôônderwies uut oaver ne banaan’nschelle oaver jongeren, diet homo bint. Gelukkig schaaft e det ne dag later wier wat biej, mar het gif is verstrèuit. Zô Jammer, loaw we hopp’n det het gezôônne verstàànd het wint van al det ààndere, zô daw we zô gauw mèugelijk àmoa wier in éénen bubbel zit.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
