• Leven in Holten
  • Contact
  • Leven in Holten
  • Contact

Wiej zölt ’t nôôit meer vergett’n

15
GEDEELD

Ie stoat er neet zô biej stille, mà wiej lèèft in ne tied, die we we nôôit meer zölt vergett’n.

Vuur iedereeene zal het nen ààndere belèèving wèèr. Gistermänn’n kek ik noar buut’n. Vuur mien op de grôônd zag ik twei liesters. ’N één’n had zich dôôd evlèug’n tèèg’n de roet’n an en ’n ààndern zat er biej te huul’n. Hèèl snèu. Het schöt oe in ’t gemood. Gedacht’n vleegt trugge noar ne tied (1918-1920). De Spaanse Griep trök oaver de wereld. Mèèns’n wuss’n neet wat eur oaverkwam. De niejsvuurziening was neet as vandaage an ‘n dag. Binn’n een paar daag’n kon die griep genadeloos touw sloan. Gelukkig wordt wiej noe, op Corona, better vuurbereid en köw we der met zien all’n ne voes tèèg’n maak’n. Tèèg’nhôôld’n köj ’t neet. Corona trek as ne roazenden Roeland oaver de wereld. Het zal de kommende joar’n deel uut bliem’n maak’n van ôôns lèèm’n. Met mekaa, schoolder an schoolder zöw we der tèèg’n vecht’n. De moatrèègeln diet er noe wordt enömm’n, bint brôôdnèurig en zölt den grôôten griepgolf mönn’n betèugeln. Loaw we hopp’n det de scharpe kàànt’n der of goat. Alles wat noe wördt vuur eschrèèm’n is in het belang van ôônze gezôôndheid. Een ieder zal zien steentje mött’n biejdrèèg’n, een ieder zal het ziene der biej veul’n. Ne kaartmiddag den ’t neet duur geet, de voetbal, àmoal of elast, de school’n diet plat ligt, het bedriefslèèm’n, hèèl völle kump ter tut stilstàànd. De lèu in zeek’nhuuze en ààndere vuurziening’n drèèit oaveruur’n. Ie kniept oen ne kèèr in ’n arm, maar het is echt woar. Zelfs het ofschèid van allerneuist’n, vriend’n of bekèènd’n , möt op angepaste wieze word’n erèègelt. Het verhaal van Minister President Rutte hakt er in. Gen môôie preuitjes, mà de naakte woarhèid. Dinge as vakààntie en trouweriej’n goat noar de achtergrôônd. “Corona”geet as éénen zôch duur ôôns làànd en wördt het woord van ‘t joar. Wiej bint er op vuurbereid. Wiej könt mekaa help’n, de telefoon dut ’t nog. Gen paniek, kontakt via de computer is neet besmettelijk, de winkels bint nog lös en doar is genog op vuurroad. Neet hamstern, lustert noar wat ôônze leiders ôôns angèèft, doot er noa en den dan zöw we der starker uutkômm’n. Vuur de rest, het is vuurjoar. Trekt er met de kinder op uut, zô lange as het nog kan en mag. De vrieje natuur is neet besmettelijk. Blieft gezôônd, het is nog nôôit zô duuster ewes of het wördt ôk wà wier lech.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.