• Leven in Holten
  • Contact
  • Leven in Holten
  • Contact

Vanuut Okk’nbrook in Hoolt’n noar de karke

32
GEDEELD

Wie zwarft nog èèm’n vedan an de de hàànd van Johan Struik. Hij breg ôôns vanuut Okk’nbrook met de klèèdwaag’n noar de karke in Hoolt’n. Tut an 1900 stun doar gen Godshuus en de lèu wadd’n dan ôk lidmoat van de Hoolter karke. Het peerd wörd’n estalt biej Kalfsterman, noe Niejkààmp. In die tied hadd’n de dôômies der vaake een boer’nbedriefke biej. Zô kon het gebuur’n det één van de jongs van ’n dôômie later boer is ewörd’n. Zô bint die noazaat’n in Hoolt’n nog altied bekèènd ôônder de huusnaam, “Dôômie Frans” De dôômiesvrouwe heul de börgelijke stàànd netuurlijk wà hôôge. Zie had neet al te völle verstàànd van het boer’ngebuur’n, getuuge eur gezegde, det ze de môtte biej de bôlle hadd’n edoane. Het was de tied van hôôge en lèège. De zitplaats’n in de karke wörd’n verpacht en de börgemèistersfemilie zat op de börgemèistersbàànk’n. Doar wadd’n ôk zô geneumde armenbàànk’n, better bekèènd as ‘n vlôôi’nhook. Àj’ doar hadd’n ezett’n was de kààns grôôt dàj’ die springers met noar huus namm’n. De vaa van Stroek gung in Hoolt’n noar de zundagsschoole. Hij was kammeroad met jongs as Sam Berg, Benjamin en Lion Pachrach en Hendrik Jan Wàànsink. Hij kon der machtig oaver vertell’n, àllèène de naam’n à bint bezunder. Pannekooken Gait en Barg Ebbe, den ’t nog nachtwacht was ewes en neet te vergett’n, Kaals Dieks, Scheer Dieks, met zien aparte fetuut’n. At e lèu vuur de helfte had eschöör’n, kon e zô mà zegg’n “Wat is ’t oe weert, ààns loa ‘k oe zô lôôp’n.” Hoolt’n was neet àllèène bekèènd um de kèunekôôplèu, mar ôk wadd’n der hèèl wat stroat’nmakers. Det is kennelijk ontstoane in 1823, met de anleg van de nieje klinkerweg van Amsterdam noar Berlijn. Die lèu wadd’n vaake moanden van huus en wônn’n dan in ne woonwaag’n. De Hoolter kèunboer’n wadd’n oaverà op de plaatselijke markten. Ôôle naam’n as Keeten Roolf, Wechstapel, Diesenplas, Jan Grofs, de kleine Ebbe, Tol Herre, Prinsen Derk en Jannao. Jannoa höuw de boer’n de hàànd zwat of. Neturlijk is vaa de klos. Één van de Hoolter kôôplèu pakt ‘m biej het vesje. Vaa dut net as of e niks wil kôôp’n en wil weg lôôp’n, mà iedere kèèr geet spel van vroag’n en bèè vedan. Het geet er strak langs hen en den kôôpman mà klaag’n det er der an möt verleez’n. Het lik eene grôôte ruuzie. Dan in één kèèr ne hààndslag, de kôôp is bezèègelt. Met mekaa zeukt ze de harbarg op um der ééne op te drink’n. De röste is wier ekèèrt.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.