• Evenementen
  • Webcam
  • Evenementen
  • Webcam

Van Waterjan tut Hens van Kalverderk

Holten gaat carnaval vieren. Zô stun het in 1969 in de Hoolterkràànte. Doar was det joar nog gen buut’ngebuur’n en der wadd’n ôk nog gen dansmarietjes. De leden van de voetbal, donateurs en de supporters van HVC wörd’n uut enèudigt. Zie mônn’n àmoal verklèèdt kômm’n en een introducee metbreng’n.. Het môs ne leutigen oamd word’n met ne buut’nreedner en ne carnavalsband. De carnavalsroad kwam binn’n onder leiding van Prins Waterjan. Het wadd’n der nog mà nèènge. De börgemèister zett’n der een grôôt vroagtèèk’n biej en sommige notabeln van Hoolt’n zagg’n het hèèmoa neet zitt’n. De jonge lèu zôll’n der met an ’n dràànk kômm’n. Carnaval in Hoolt’n was vleuk’n in de karke. Het fees gung duur. Tonproater Berend Willem Dapper kwam met zien onvergettelijke versje “Ja zo’n aardigheid.” Het carnavalsvirus had touw esloane en zôl ne vaste plaatse krieg’n in Hoolt’n. Blèèf het in 69 nog biej één’n oamd, noe vieftig joar later begint het met “Kèunedarp lacht.” Prins Hens van Kalverderk zal de Kèunedarpers welkom heet’n biej de Poppe. Hij zal de feestzaal binn’nkomm’n met ziene voltallige road van elme, op e wacht duur, ôôndermeer zo’n vèèrtig senatoor’n en ôôld prins’n en det àmoal ôônder de feestelijke klàànk’n van de Brààndheultjes. Vuurdet het carnaval lösbast, hef Prins Hens dan ôk à Prinsenbal en het feest biej de manege van Snorrewind achter de rugge. Kèunedarp lacht, ne machtigen môôi’n oamd vuur alle Hoolter. Het is een gebuur’n van ôôns kent ôôns, met optreed’ns van ôônze eeg’n Brààndheultjes en hèèle bekèènde môôie tonn’nproaters. Één van de hèugtepunt’n is netuurlijk, de verkiezing van Kèunedarper van het joar. Wie is ter duur de Senaat verkèuz’n en mag zich in het riegje schaar’n van al die lèu en groep’n, diet wat vuur Hoolt’n betèèk’nt hebt. De grôôte zaal biej de Poppe zal der feestelijk uutzeen. Ie wordt welkom eheet’n in ne zèè van ballonn’n. Dèènk noe neet, det is niks vuur miej, trek de goeie schoone an en geniet van alles wat er passèèrt. Het is à lange neet meer een fees vuur àllèène rôôd zwart’n, de verzuuling lig achter ôôns en blauw witt’n en rôôd zwart’n komt mekaa tèèg’n biej Kèunedarp lacht. Het carnavalsgebuur’n in Hoolt’n is uut egreuit tut een joarlijks fenomeen vuur alle Hoolter en nemt mà röstig an, het wörd’n vuur vieftig joar trugge al ezeg, oene beste kammereui zit biej de Fienpreuvers.

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.