• Evenementen
  • Webcam
  • Evenementen
  • Webcam

Vallende blaa

Met ne half verdôôfde môônd zit ie biej te komm’n van een bezeuk an de tandarts. Gen Steun’nbarg meer of Houck, mà ne môôie jonge vrouwe leg netjes uut, wat er steet te gebuur’n. Ie loat het geloat’n oaver oe hen kômm’n en bint bliej, dàj’ wier op huus an könt. Ôônderuuut gezakt trek de verdôôving hèinig weg en ie zeet de blaa geduurig noar beneed’n dwarreln. Het gif de vergàànkelijkhèid, van alles wat lèèft, nog mar is duudelijk wier. Die vallende blaad’n doot miej dèènk’n an rèiz’n, lange gelèène. Ooievaars diet uutvleuig’n noar Duutslàànd, Fienpreuvers woet de nieje prins uut een tillevisietoestel kwam, feestende carnavallisten uut Wiehe en den boer woer wiej vrogger al eerpel haal’n met de ponniekoare. In ne flits schöt het oe duur de gedacht’n en ie wèèt det het nôôit wier wördt as eerder. Het lèèm’n geet vedan. De boer’n vecht vuur eur bestoan. Stikstof is het tèuverwoord. Vrogger, at mien vaa hen stikstof zèèi’n gung was det good vuur’t làànd. Noe is het àmoa te völle van het goeie. Vrogger wàj’ bliej, àj’ een stukske vlèèis op ’t bord krèèg’n. Noe is det in één kèèr neet good meer. Noe möt het kunsvlèèis word’n. De boer’n, diet eeuwen làànk, der vuur ezörgt hebt, daw we te ett’n krèèg’n, biw we neet meer nèurig. Alles kump uut ne febriek en oaver honderd joar dèènke wiej det alles doar vedan kump. Oaver honderd joar is de wereldbevolking völle kèèr’n grötter as noe en al die mèèns’n möt wat te ett’n hemm’n. Det kriewe as mèèns’n noe à neet vuur mekaa. Hoe lange hôôle wiej det nog vol? De dinausaurissen bint uut estörm’n. Zol het de mèènsheid ôk zô vergoan? Ôônz’n aardkloot zal het oaverlèèm’n. Hoe zut het er uut oaver honderdduuz’nd joar? De gedacht’n dwaalt hoe langer hoe veerder weg. Gelukkig, de uutgewarkte verdôôving breg miej trugge noar de warkelijkhèid. Een flauw zunneke schient duur de kaal word’nde bèume. Èèm’n ne friss’n nèuze haal’n. De drèugte is vuur een grôôt gedeelte vuurbiej. De paddesteule scheet her en der uut de grôônd. Het is harfs en de blaa, die blieft vall’n

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.