• Leven in Holten
  • Contact
  • Leven in Holten
  • Contact

Tweed’n woensdag in meert

9
GEDEELD

Het zal oe misschien neet völle zegg’n, 11 meert. Sommigen ôônder ôôns wèèt precies woer ’t oaver geet. Doar bint tied’n ewes det iedereene det wus. In de joar’n veer vuur nèèngtienhonderd gung’n de Hoolter trouw noar de karke. Biddag vuur het gewas. De zèèg’n wörd’n evroag’n vuur het opkômmende gewas. Noh ja, àmoa, völle jonge lèu trökk’n in die tied noar de “Maartenkeur”, de grôôte vuurjoarsmarkt in Lochem. Het gung der doar nog middeleeuws an touw. Ie heur’n de jongs schreeuw’n, “Alòh, de mèikes möt ekuurt word’n.” Zie prebèèr’n de deerns een kruus op het jak te zett’n, zô at ze vrogger ôk de scheuipe en de beeste mark’n, at ze verkoch wadd’n. Het was nog een oaverbliefsel uut vroggere tied’n, toen der nog echte vriejstersmarkt’n wadd’n. Wat ne tied hè! Netuurlijk zag ie doar ôk de Hoolter varken’nkôôplèu. Woer zag ie ze noe neet. Vanuut Meppel en Omm’n haal’n ze met de klèèdwaag’n de keuntjes op, um ze ôônder meer in Lochem an de man te breng’n. Het wadd’n neet de lèu, diet tied hadd’n vuur Biddag en de taal, diet ze op de markt leut’n heur’n, was lange neet altied geschikt vuur kleine kinder. Ôk in het midd’n van de vuurige eeuw, de tied van dôômie Knipscheer en dôômie Hoogkamp, gung’n de lèu nog altied trouw noar de karke. De kôôplèu hadd’n de klèèdwaag’n in eruilt vuur kleine gemotoriseerde vark’nwaag’ntjes. De jong’n organiseerd’n op den dag à zelf vanalles, van toneeloamd van de CJMV tut ne grôôte bazar ten bate van Rehoboth. Legergoedern wörd’n der verkoch en doar wörd’n zelfs of edàànst biej hotel Müller. De school’n hadd’n vriejof. Iedereene kon den dag lekker zien eeg’n gàànk goan. Trugge noar de tied van vandaage. Het is wier biddag vuur ’t gewas ewes. De trouwste karkgangers hebt de dienst’n met könn’n maak’n. An ààndern is het kats vuurbiej egoane. Ne dag as alle ààndern. De tied’n bint rap verààndert. Heur’n ie vuur vieftig joar, de kôôplèu nog wal is zegg’n; “Zet het kriet er mar op”, àj’ een deerntje versierd hadd’n, tèèng’nwoordig màj’ det àllèène nog met de ôôg’n. Ne goeie zaak netuurlijk. Vark’nkôôplèu, zie bint vôt uut het stroatbeeld. Man en vrouwe, zwart en wit, in ieder gelèuve, oaveral in de wereld, gelieke recht’n. Det is nog ne langen weg die we te goan hebt. Ne dag vuur gelieke recht’n, tweed’n woensdag in meert, het zôl môôi wèèr. Loaw we ôôndertuss’n in ôôns làànd astebleef neet an alle kàànt’n duursloan.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.