• Leven in Holten
  • Contact
  • Leven in Holten
  • Contact

Supporters

1
GEDEELD

Het verschil tuss’n Rôôdzwart en Blauwwit. Blauwwit köw we filstèèr’n en Rôôdzwart nog neet. Vieftig joar Blauwwit, wat vlug de tied. Ontstoane uut de Blauwwitt’n van Markel met spöllers as Popp’n Bets, Koekoeks Oarnd Jan en Lammers Wilm. Och, ongetwiefeld verget ik ter een paar, het is neet ààns. Één van de èèrste elftall’n van de Blauwwitt’n uut Hoolt’n, Gert Dikkers, van de mölle, Jaap Thalen, Henk Hovenkamp en Piep Jan Willem. Wiej zagg’n ze spöll’n  an de Markelseweg en op de Meermanskààmp. Keerls as Mèister Knijff en Jan Wiggers, Blauwwitters van het èèrste uur. Met mekaa en al die ààndere vriejwilligers hebt ze Blauwwit e maak tut wat het noe is. Hoolt’n besteet uut Blauwwitters en en Roodzwarters, diet vandaage an’n dag, good met mekaa duur eene duure könt. Det was ofgelôôp’n wekke te zeen op Meermanskààmp. Supporters van bèire clubs kwamm’n um te kiek’n of de Rôôdzwart’n nog mèugelijkheed’n hadd’n um te promovèèr’n. De èèrste wedstried tèèg’n Activia hadd’n ze an de bokse krèèg’n met 1-0. Met touw geknepp’n bill’n wörd’n de wedstried e volgt. Bas van de Schreur wörd’n e mist, woerumme hef e ôk altied die kleppe lös, was het commentaar langs de liene. Gelukkig had Hoolt’n Erik Peters op e trommelt uut het tweede. Activia was biej tied en wiele starker, mà de goal van Peters völ an de ààndere kàànte. Noe gen goals tèèg’n krieg’n, want dan was het èine verhaal. Een schot op de poal, ne rilling gung der duur de Hoolt’nsupporters. Het zal toch neet? Gelukkig schöt Huusman de 2-0 in an de ààndere kàànte en zô kon ze zich opmaak’n vuur de wedstried tèèg’n Heerde. Doar gaff’n ze te gemakkelijk de twee nul vuursprong nog uut hàànne, mar ankommenden zundag hebt ze biej nen oaverwinning de dèirde klasse wier te pakk’n. Ôôit hebt ze doar al is eerder e spölt. Begin joar’n tachtig spöll’n ze zelfs met de boamst’n met. Vèèr’ndartig joar e lèène vunn’n ze eur Waterloo in Busloo. Sinds die tied altied in de vèèrde klasse of lèèger. Het wördt tied det disse generatie ôôlde tied dut herlèèm’n. Zundag hebt ze de kààns, dan möt het gebuur’n. De Meermanskààmp op zien’n kop. Roodzwarters en Blauwwitters zörgt dàj der biej bint, want één kèèr in de dartig joar, det is neet zô vaake. Môch ie noe hèèmoa neet van voetbal hôôld’n, mà meer van muziek, dan köj’ ôk nog uutbooldern in de Bèusebarg. Het Boolderfeest van de Korhaan’n, vuur de boerderieje van Poalmans Herman, het tèèg’nswoorige “Haanennös”. Wiej nog meer lawaai heur’n dan möj’ een èineke veerder, de Zoerbarg op, doar völt te geniet’n van de brullende motoor’n. Kortumme doar is het kômmende weekend wier vanalles te doon in Hoolt’n. Aj’ het good in plänt köj misschien ne combinatie maak’n van alle drei de evenement’n. Loaw we hopp’n det de Rôôdzwart’n met de platte koare duur Hoolt’n hen goat en Rôôdzwart’n en Blauwwitt’n mekaa wier könt filstèèr’n. Amoa völle wille en succes, wis en waarachtig.

De Vèèkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.